DÜNYA
QAZAXISTANDA ƏCNƏBİLƏR KİMSƏSİZ UŞAQLARI ÖVLADLIĞA GÖTÜRÜRLƏR
Qazaxıstan Baş Prokurorluğunun əməkdaşı Andrey Kravçenko demişdir ki, onun ölkəsində hər dörd kimsəsiz uşaqdan birini əcnəbilər övladlığa götürürlər. 1999-cu ildən 2003-cü ilədək övladlığa götürülmüş 13668 kimsəsiz uşağın 3127 nəfəri əcnəbilərin payına düşür. Hazırda təkcə ABŞ-da 2526 qazaxıstanlı uşaq yeni ailələrdə yaşayır.
ABŞ Dövlət Departamentinin 2002-ci il üçün məlumatında deyilir ki, amerikalı ailələrin himayəyə götürdükləri uşaqların sayına görə, Qazaxıstan 6-cı yerdədir. Bu siyahıda ondan əvvəl gələn ölkələr Çin, Rusiya, Qvatemala, Cənubi Koreya və Ukraynadır.
Hazırda Qazaxıstanda xarici ölkələrin bu işlə məşğul olan şirkətlərinin 28 nümayəndəliyi fəaliyyət göstərir. Bir uşağı himayəyə götürmək üçün təxminən 20-50 min dollar vəsait sərf olunur.
Bölmənin digər xəbərləri
