Qazaxıstanın xarici işlər naziri: Çinlə münasibətlər regionda sülhü və sabitliyi gücləndirir
Bakı, 20 may, AZƏRTAC
Astanada Qazaxıstanın və Çinin xarici işlər nazirləri Murat Nurtleu və Van I arasında görüş olub.
AZƏRTAC “Kazinform”a istinadən xəbər verir ki, danışıqlar zamanı nazirlər bir neçə ikitərəfli saziş imzalayıblar.
Qazaxıstanlı diplomat bildirib ki, Çinlə qonşuluq münasibətlərinin möhkəmləndirilməsi ölkəsi üçün əsas prioritetdir. Bu, dövlətlərin maraqlarına tam cavab verir, regionda sülhə və sabitliyə töhfə verir.
"Çətinliklərə baxmayaraq, ölkələrimiz beynəlxalq gündəmdə olan məsələlərdə oxşar mövqeləri bölüşür. Bunu BMT, AQEM və digər beynəlxalq təşkilatlar çərçivəsində qarşılıqlı dəstəyin səviyyəsi sübut edir”, - deyə Qazaxıstanın xarici işlər naziri qeyd edib.
O əlavə edib ki, Qazaxıstan və Çin iki ölkə arasında çoxtərəfli əlaqələrin bütün spektrini əhatə edən hüquqi bazanı təkmilləşdirir. Diplomatın sözlərinə görə, 2023-cü ildə Qazaxıstan və Çin arasında ticarət dövriyyəsi 30 faiz artaraq rekord həddə - 41 milyard dollara çatıb. Bundan əlavə, Çin ardıcıl olaraq Qazaxıstanın ən böyük beş investoru sırasındadır. Ümumi dəyəri 7 milyard dollardan çox olan onlarla layihə artıq həyata keçirilib.
Bölmənin digər xəbərləri
