Qazi: Haqq nahaqın uzun illər sürən hökmranlığına 44 günə son qoydu
Bakı, 16 iyul, AZƏRTAC
Laçın işğal ediləndə bir yaşım var idi. Laçını xatırlamasam da həmişə məni ona doğru çəkən bir qüvvə var idi. Doğma yurdumun şəkilləri, keçmiş videogörüntüləri ilə, valideynlərimin danışdığı xatirələri təsəvvürümdə canlandıraraq böyüdüm. Tez-tez atəşkəsin pozulması, mülki vətəndaşlarımızın, hərbi qulluqçularımızın şəhid olması, xüsusilə uşaqların düşmənin hədəfinə çevrilməsi torpaq həsrətindən doğan nifrəti ikiqat alovlandırırdı. Tovuz döyüşlərində general-mayor Polad Həşimov, polkovnik İlqar Mirzəyev, digər zabit və hərbi qulluqçuların şəhid olması səbirimizin sonuncu dayanacağı oldu. Milyonlarla ürək bir amal uğrunda döyünməyə başladı. Əli silah tutan hər kəsin üz tutduğu məkanlar Səfərbərlik və Hərbi Xidmətə Çağırış üzrə Dövlət Xidmətinin rayon idarələri oldu. Hərbi komissarlıqların qarşısı cəbhəyə könüllü getmək üçün müraciət edən gənclərlə dolub-daşırdı. İzdihama qarışanlardan biri də mən idim. Bıçaq sümüyə dirənmişdi, bu, artıq son idi. Könüllü müraciət edənlərin səbirsizliklə gözlədiyi məqam 2020-ci ilin sentyabrın 27-də yetişdi.
Bunu AZƏRTAC-a müsahibəsində Vətən müharibəsi qazisi Valeh Məmmədov deyib.
2020-ci ilin sentyabrın 29-da ərazi bütövlüyümüz uğrunda savaşa atılan Valeh Cəbrayıl, Füzuli rayonları, həmçinin Xocavənd rayonunun Hadrut və Qırmızı Bazar qəsəbələri istiqamətində gedən hərbi əməliyyatlarda iştirak edib.
O, fikirlərinə belə davam edib: “Milyonlarla azərbaycanlı bu günü illərlə gözləmişdi. Çünki düşmənə qarşı humanist davranışlarımız və sülh çağırışlarımız təxribatlarla yekunlaşırdı. Onlar humanizm prinsiplərindən, insanlıqdan kənar davranış nümayiş etdirir, üzbəüz döyüşməkdən qorxaraq sivilləri hədəf alırdılar. Vətən müharibəsi dövründə bir neçə dəfə onların vəhşi xislətinə şahidlik etdik. Təəssüf ki, Gəncə, Bərdə, Naftalan kimi cəbhə xəttindən kənar ərazilərdə mülki əhali, azyaşlılar, körpələr terror qurbanı oldular. Ermənilərin törətdikləri terrorlar intiqam, qisas hisslərinin vulkan kimi püskürməsinə, azğın düşmənin cavabını döyüş meydanında artıqlaması ilə verməyimizlə nəticələnirdi. Onlar nə qədər vəhşi olsalar da, imanımız, aldığımız tərbiyə və mərhəmət hisslərinə sahib olmağımız bizi yolumuzdan azdırmadı, yalnız savaş meydanında üzbəüz kişi kimi döyüşdük. Mülki vətəndaşlara, əliyalın əhaliyə qarşı silahımızı tuşlamadıq. Haqq yolunda olmağımız, savaşımızın ədalətli olması Qələbəmizi şərtləndirən amillərdən idi. Şükür Allaha ki, haqq nahaqın uzun illər sürən hökmranlığına 44 günə son qoydu, illərin torpaq həsrəti möhtəşəm Zəfərlə bitdi. Vətən müharibəsi xalqımızın necə döyüşkən, qəhrəman olduğunu, anaların necə igid oğullar böyütdüyünü dünyaya göstərdi. Təəssüf ki, şücaəti ilə seçilən neçə-neçə oğullarımızı itirdik. Şəhidlərimizlə, onların yüksək məqamı ilə fəxr edirik. Qələbəmizi onlara borcluyuq”.
V.Məmmədov şəhid ailələrinə, müharibə iştirakçıları və qazilərə göstərilən dövlət dəstəyindən razılıq edib. O, dövlət dəstəyi ilə 2 aydan çox Psixi Sağlamlıq Mərkəzində sosial-psixoloji yardım aldığını, müəyyən ehtiyaclarına görə “YAŞAT” Fonduna müraciət etdiyini və müraciətinin öhdəliyə götürüldüyünü də qeyd edib. Aldığı müalicədən sonra qazi V.Məmmədov vəziyyətinin yaxşı olduğunu bildirib. Həkimlərin qazilərə olan diqqətini yüksək qiymətləndirən Valeh Məmmədov onun sağlamlığının bərpasında iştirak edən həkimlərə təşəkkürünü bildirib.
Qeyd edək ki, Vətən müharibəsi qazisi Məmmədov Valeh Əvəz oğlu “Hərbi xidmətdə fərqlənməyə görə” 3-cü dərəcəli medal və “Vətən müharibəsi iştirakçısı” medalı ilə təltif olunub.
Bölmənin digər xəbərləri
