QƏBƏLƏDƏ TURİZM VƏ OTELÇİLİK PEŞƏ TƏDRİSİ MƏKTƏBİ İSTİFADƏYƏ VERİLMİŞDİR
AZƏRTAC xəbər verir ki, Təhsil Nazirliyinin Qəbələ Turizm və Otelçilik Peşə Tədrisi Məktəbinin binası istifadəyə verilmişdir.
Məktəbin açılışı mərasimində təhsil naziri Misir Mərdanov çıxış edərək, peşə təhsilini təkmilləşdirməyin vacibliyindən danışmış, otelçilik, turizm sahəsi üzrə kadrların hazırlanması istiqamətində görülən işlər barədə məlumat vermişdir. Bildirilmişdir ki, bu məktəb Azərbaycanda turizm və otelçilik üzrə kadrlar hazırlayacaq ilk peşə təhsili ocağıdır. Burada eyni vaxtda 400 uşaq və gənc təhsil ala biləcəkdir.
İnşasına 2006-cı ildə başlanmış bina müasir texniki avadanlıqla təmin olunmuşdur. Burada qızlar və oğlanlar üçün yataqxana kompleksi, qazanxana da tikilmişdir. Müasir fənn kabinetlərinin, laboratoriya, emalatxana, konfrans və idman zallarının, kompyuter otağı, kitabxananın fəaliyyət göstərəcəyi məktəbdə gənclərin otelçilik və turizm peşələrinə yiyələnmələri üçün lazımi şərait yaradılmışdır.
Rayonun Qəmərvan kəndində yeni tikilmiş 360 şagird yerlik orta məktəb binasının da açılışı olmuşdur. Regionların sosial-iqtisadi inkişafı Dövlət proqramı çərçivəsində inşa olunan tədris ocağı idman zalı, kitabxana, müasir havalandırma və işıqlandırma sistemləri ilə təmin olunmuşdur.
Məktəbin açılışı mərasimində təhsil naziri Misir Mərdanov iştirak etmişdir.
Bölmənin digər xəbərləri
