Qənirə Paşayeva: Ölkəmizdə aparılan islahatlar konseptual xarakter daşıyır
Bakı, 10 mart, AZƏRTAC
Prezident İlham Əliyevin VI çağırış Milli Məclisin ilk iclasında tarixi çıxışından təxminən 2 il ötür. Dövlətimizin başçısının 2020-ci il martın 10-da parlamentdə çıxışı islahatlar kursunun davamlılığını və perspektivlərini özündə əks etdirirdi. Əslində, növbədənkənar seçkilərin keçirilməsinin əsas səbəbi də məhz islahatları dərinləşdirmək məqsədi ilə Milli Məclisin yeni tərkibdə işini təşkil etmək idi.
Bu fikirləri AZƏRTAC-a açıqlamasında Milli Məclisin Mədəniyyət komitəsinin sədri Qənirə Paşayeva deyib.
Q.Paşayeva qeyd edib k, siyasi sistemin təkmilləşdirilməsi işində yeni tərkibdə formalaşmış Milli Məclisin üzərinə böyük məsuliyyət düşür. “Biz bunu ötən iki il ərzində cərəyan edən hadisələr fonunda daha yaxından müşahidə edə bildik. Ötən iki ilin ölkəmizin həyatında fövqəladə önəmli hadisələrlə zəngin olduğu hər kəsə məlumdur. Pandemiya şəraiti, onlayn rejimdə fəaliyyət təcrübəsi, Tovuz döyüşləri, 44 günlük Vətən müharibəsi, postmüharibə dövründə geniş bərpa-quruculuq işlərinin aparılması, infrastruktur layihələrinin icrasına başlanılması və sair dediklərimizə sübutlardır.
Düşünürəm ki, VI çağırış Milli Məclis ötən dövr ərzində üzərinə düşən tarixi missiyanı layiqincə yerinə yetirib. “Azərbaycanın mədəniyyət paytaxtı - Şuşa şəhəri haqqında” Qanunun qəbul edilməsi, Azərbaycan ilə Türkiyə arasında imzalanmış Şuşa Bəyannaməsinin təsdiq olunması ölkəmizin ictimai-siyasi həyatında, hüquq sistemində məsuliyyətli və şərəfli dövr yaşadığımızın təsdiqidir”, - deyə komitə sədri vurğulayıb.
Milli Məclisdə 11 siyasi partiyanın və çoxsaylı bitərəf namizədlərin təmsil olunduğunu diqqətə çatdıran komitə sədri vurğulayıb ki, müxalifət partiyalarının təmsilçilərinin VI çağırış Milli Məclisin komitələrinin rəhbərliyində təmsil olunması, o cümlədən parlamentin sədr müavini seçilməsi siyasi sistemimizi möhkəmləndirmək, siyasi münasibətləri sağlam zəmində gücləndirməyin təzahürüdür.
Aydındır ki, siyasi islahatların partiyalararası geniş dialoq aparılmadan həyata keçirilməsi mümkün deyil. Prezident Administrasiyası nümayəndələrinin bütün siyasi qüvvələrin rəhbərləri ilə görüşlər keçirməsi genişmiqyaslı islahatlar dövründə siyasi islahatların zəruriliyini aydın ifadə edir.
Əlbəttə, Milli Məclisin bu planda əsas işi qanunvericilik sahəsində də siyasi sistemin təkmilləşdirilməsi üçün lazımi addımlar atmaqdan ibarətdir. Çoxpartiyalı sistemin inkişafı naminə bütün alətlər spektri mövcud olmadan yeni dövrün çağırışlarına cavab vermək qeyri-mümkündür.
Q.Paşayeva deyib ki, ölkədə aparılan islahatlar uyğun əməli fəaliyyət sahələrini əhatə etməklə həm konseptual, həm də struktural xarakteri daşıyır. Ölkəmizdə köklü kadr islahatları aparılır. Gəlin etiraf edək ki, bir sıra yerli icra orqanlarında müşahidə olunan xoşagəlməz mənzərələr yalnız həmin rayonların əhalisini deyil, bütövlükdə xalqın hiddətinə səbəb olurdu. “Xalqın birinci xidmətçisi mənəm və bütün dövlət məmurları belə işləməlidirlər”,- deyən dövlətimizin başçısı hər zaman vurğulayır ki, məmurlar öz məsuliyyətini dərk etməli, xalqla bir yerdə, Vətənə sədaqətli olmalı, heç bir xarici dairənin təsiri altına düşməməlidirlər.
Komitə sədri qeyd edib ki, qanunverici orqan olan Milli Məclisin deputatlarının qarşısında böyük vəzifələr dayanır. Yeni dövrün tələbləri dərin məzmunlu, çağdaş qanunların hazırlanması və qəbul edilməsini zəruri edir. Siyasi sistemin gücləndirilməsi üçün yeni qanunvericilik təşəbbüsləri önəm kəsb edir. “Milli dəyərlərimizi qorumaq üçün mədəni irsimizlə bağlı qanunvericilik bazası daha da genişləndirilməlidir. İqtisadi islahatların dərinləşməsi işinə töhfə verən qanunların qəbulu da tarixi zəfər qazanmış ölkəmizin haqqı, yeni dövrün, yeni reallığın irəli sürdüyü tələbdir.
Unutmamalıyıq ki, Azərbaycan sosial dövlətdir. Ölkəmizdə şəffaflıqla bağlı gedən proseslər iqtisadi imkanlarımızı gücləndirir, kölgə iqtisadiyyatına qarşı ciddi zərbə vurur.
Eyni zamanda, dünyəvilik, demokratizm prinsipləri daha geniş bərqərar olmalı, radikalizmlə mübarizə geniş vüsət qazanmalıdır. Çünki xalqımız əmin-amanlıq, sabitlik, firavanlıq, təhlükəsizlik mühitində yaşamaq haqqına sahibdir. Dövlətimizin başçısının dəfələrlə, o cümlədən VI çağırış Milli Məclisin ilk iclasındakı nitqində söylədiyi kimi, əldə etdiyimiz ən böyük uğurlardan biri siyasi sabitlikdir. Bəli, siyasi sabitliyin qorunmasında bütün vətəndaşlar və vətəndaşların səs verib, mandat qazandırdığı deputatlar çox fəal iştirak etməlidirlər”, - deyə Qənirə Paşayeva fikrini yekunlaşdırıb.
Bölmənin digər xəbərləri
