QƏTİ TƏDBİRLƏR GÖRÜLÜR
Əhalinin rifahının yaxşılaşdırılmasını daim diqqət mərkəzində saxlayan möhtərəm Prezidentimiz cənab Heydər Əliyevin rəhbərliyi ilə aparılan hərtərəfli demokratik islahatlar hüquq sistemində də əsaslı dəyişikliklərə səbəb olmuş, insan haqlarının daha etibarlı təmin edilməsi və vətəndaşların mənafelərinin qorunması üçün ardıcıl addımlar atılmışdır. Hüquqi yardım sahəsində üzərinə mühüm vəzifələr düşən Ədliyyə Nazirliyi tərəfindən də bu məsələyə yanaşma köklü surətdə dəyişmiş, vətəndaşların müraciətlərinə diqqətlə yanaşılması üçün təsirli tədbirlər görülmüşdür.
Əmlakla bağlı və digər mühüm hüquqi hərəkətlərin həyata keçirilməsi, insanların həyatında ən əlamətdar hadisələrin - nigahın bağlanması, övladın dünyaya gəlməsi və sair- qeydə alınması ilə əlaqədar geniş əhali kütləsi ilə gündəlik təmasda olan notariat və vətəndaşlıq vəziyyəti aktlarının dövlət qeydiyyatı orqanlarının fəaliyyəti Ədliyyə Nazirliyi rəhbərliyinin daim diqqət mərkəzində olmuş, bu orqanların işində ictimaiyyətin narazılığına və haqlı şikayətlərə səbəb olan halların qarşısının alınması üçün məqsədyönlü tədbirlər həyata keçirilmişdir.
Belə ki, köbud nöqsanlara, vətəndaşların əsassız get-gələ salınması, onlara qayğısız və bəzən ögey münasibət bəslənməsi, süründürməçiliyə və hətta qanun pozuntularından belə çəkinməyərək digər mənfi hallara yol verdiklərinə görə Dövlət notariusları F.Hüseynov \Bakı şəhəri\, İ.Tağıyev \Yevlax rayonu\, M.Muradov \Laçın rayonu\ tutduqları vəzifələrdən azad olunmuş, Kürdəmir və Balakən VVADQ şöbələrinin müdirləri, bir sıra digər rayonların dövlət notariusları sonuncu xəbərdarlıqla ciddi intizam məsuliyyətinə cəlb edilmişlər.
Həmçinin, Notariat və VVA idarəsinin fəaliyyəti müasir tələblər səviyyəsində qurulmadığına, qanun pozuntuları və nöqsanlara biganəlik ğöstərildiyinə görə idarənin rəisi və onun müavini tutduqları vəzifələrdən azad edilmişlər.
Bu orqanlarda mövcud problemlərin təhlili və işin təkmilləşdirilməsi yollarının araşdırılması məqsədi ilə bu məsələ Bakı və respublikanın digər bölgələrinin dövlət notariusları, VVADQ şöbələri müdirlərinin iştirakı ilə ilk dəfə olaraq Ədliyyə Nazirliyinin geniş Kollegiya iclasında müzakirə edilmişdir.
Kollegiyada notariat və VVADQ orqanlarının işinin yaxşılaşdırılması və bu sahədə əsaslı dönüş yaradılması üçün idarənin rəhbərliyinin qarşısında mühüm vəzifələr dayandığını bildirən ədliyyə naziri Fikrət Məmmədov bu orqanların fəaliyyətinin yeni qəbul edilmiş qanunlara, ilk növbədə Mülki və Ailə Məcəllələrinə, “Notariat haqqında” Qanuna uyğun, müasir tələblər səviyyəsində qurulması, təsirli nəzarətin təşkili barədə konkret tapşırıqlar vermiş, işində dönüş yarada bilməyən, qüsurlara yol verən işçilər barədə qəti tədbirlər görüləcəyini bildirmişdir.
Kollegiyada Notariat və VVA idarəsinin yeni rəisi İ.Məmmədov, dövlət notariusları, VVADQ şöbələrinin müdirləri və başqaları çıxış edərək mövcud nöqsanların səbəblərindən və onların aradan qaldırılması yollarından bəhs etmiş işin təkmilləşdirilməsi üçün görülmüş qəti tədbirləri dəstəkləyərək hər bir əməkdaşın bütün bunlardan nəticə çıxarmasının vacibliyini vurğulamış, müvafiq təkliflər vermişlər.
Həmçinin, Kollegiyada insanların həyatında ən əlamətdar hadisələrin qeydiyyatının təntənəli şəkildə aparılması və bu zaman milli adət-ənənələrimizin nəzərə alınması, mənəvi dayağa ehtiyacı olanlara daha qayğılı münasibət göstərilməsi, notariat və VVADQ fəaliyyəti ilə bağlı nazirliyə daxil olan şikayətlərin dərhal və hərtərəfli araşdırılması tələb olunmuş, konkret tədbirlər görülməsini nəzərdə tutan əhatəli qərar qəbul olunmuşdur.
Bölmənin digər xəbərləri
