Qobi səhrasında ilk Günəş istilik elektrik stansiyası işə salınıb
Bakı, 10 oktyabr, AZƏRTAC
Çin Qobi səhrasında ilk Günəş istilik elektrik stansiyasını işə salıb. Bu barədə “South China Morning Post” yazır.
AZƏRTAC xarici mətbuata istinadla xəbər verir ki, elektrik stansiyasını “China Three Gorges Corporation” dövlət korporasiyası yaradıb. Kompleks Günəş işığını iki qülləyə cəmləyən 27 min güzgüdən ibarətdir. Onlar bir-birindən təxminən min metr məsafədədir. Belə bir həll ilk dəfə istifadə olunur.
Sistem təxminən 570 dərəcə temperaturda enerji əldə etməyə imkan verir. İstilik turbinləri hərəkətə gətirən buxar istehsal etmək üçün lazımdır. Onlar da öz növbəsində enerji istehsal edirlər. Mühəndislərin sözlərinə görə, elektrik stansiyası elə işləyir ki, istehsal gün batandan sonra və ya buludlu havada davam edir.
Korporasiya iki qüllənin sistemin daha səmərəli işləməsi üçün lazım olduğunu vurğulayıb. Birincisi səhər, digəri isə günortadan sonra işləyir. Bu, tək bir qüllənin istifadəsi ilə müqayisədə səmərəliliyi 25 faiz artırır. Bundan əlavə, daha az sayda güzgü tələb olunur ki, bu da layihənin qiymətini azaldır.
Bölmənin digər xəbərləri
