MƏDƏNİYYƏT
QOBUSTANDAKI YENİ TAPINTILARA HƏSR OLUNMUŞ SƏRGİ
“Qobustan” muzey-qoruğunda YUNESKO-nun “Dünya irsi” proqramının 30 illiyinə həsr olunmuş mərasim keçirilmişdir. Tədbirdə Azərbaycan Mədəniyyət Nazirliyinin, Bakı Şəhəri İcra Hakimiyyətinin, YUNESKO-nun nümayəndələri, diplomatlar, kütləvi informasiya vasitələrinin əməkdaşları iştirak etmişlər.
Mərasimdə Azərbaycan geoloqları və arxeoloqlarının lap bu yaxınlarda aşkar etdikləri qayaüstü təsvirlərin təqdimatı olmuşdur. Xatırladaq ki, bu tapıntılar hələ kütləvi surətdə nümayiş etdirilməmişdir. Mərasim iştirakçıları Qobustanın onilliklər boyu tarixçilərin, antropoloqların və rəssamların tədqiqat obyekti olan tarixi-mədəni irsinə həsr edilmiş xüsusi fotosərgi ilə də tanış olmuşlar. Burada Azərbaycanın tanınmış modelyeri Fəxriyyə Xələfovanın Qobustan motivləri əsasında yaratdığı kollleksiyadan bir neçə fotoşəkil də nümayiş etdirilmişdir. Bu kolleksiyanın təqdimatını 2003-cü ilin yazında “Qobustan” muzey-qoruğunda keçirmək nəzərdə tutulur.