Qoruq ərazisində və dəmir yolu stansiyasında silah-sursat aşkarlanıb
Bakı, 25 yanvar, AZƏRTAC
Daxili işlər orqanları qanunsuz saxlanılan silah-sursatın aşkarlanaraq götürülməsi məqsədilə uğurlu əməliyyat-axtarış və profilaktiki tədbirləri davam etdirir.
Daxili İşlər Nazirliyinin mətbuat xidmətindən AZƏRTAC-a bildiriblər ki, Qaradağ Rayon Mühafizə Şöbəsi və 11-ci polis bölməsi əməkdaşlarının daxil olmuş məlumat əsasında birgə keçirdikləri əməliyyat-axtarış tədbirləri nəticəsində yanvarın 24-də Qobustan Milli Tarix-Bədii Qoruğundan sellofana bükülmüş bir tapança və bir patron darağı aşkarlanaraq götürülüb.
Nəqliyyatda Baş Polis İdarəsi əməkdaşlarının yanvarın 23-də daxil olmuş məlumat əsasında keçirdikləri əməliyyat-axtarış tədbirləri nəticəsində isə Füzuli rayonunun Daşburun dəmir yolu stansiyasından bir ədəd F-1 qumbarası, qumbara alışdırıcısı, işarəverici fişəng, yeddi ədəd boş avtomat sandığı, 1116 ədəd müxtəlif çaplı avtomat patronu və sökülmüş vəziyyətdə olan “TOZ 8” markalı tüfəng aşkarlanıb.
Faktlarla bağlı araşdırmalar aparılır.
Bölmənin digər xəbərləri
