QUBALILAR QARŞIYA QOYULMUŞ VƏZİFƏLƏRİ YERİNƏ YETİRMƏYƏ HAZIRDIRLAR
AZƏRTAC xəbər verir ki, Quba Rayon İcra Hakimiyyətində cari ilin doqquz ayının yekunları ilə bağlı keçirilən müşavirədə görülən işlər ətraflı təhlil edilmiş, qarşıda duran vəzifələr müzakirə olunmuşdur.
Rayon icra hakimiyyətinin başçısı Rauf Həbibov Nazirlər Kabinetinin Prezident İlham Əliyevin sədrliyi ilə oktyabrın 22-də keçirilən, 2007-ci ilin doqquz ayında sosial-iqtisadi inkişafın yekunlarına və qarşıda duran vəzifələrə həsr olunmuş iclasında dövlətimizin başçısının nitqlərindən irəli gələn vəzifələr haqqında məruzə etmişdir.
Məruzəçi ölkə başçısının iclasdakı giriş və yekun nitqlərində səslənmiş fikirləri, qarşıya qoyulmuş vəzifələri xatırlatmış, hesabat dövründə Azərbaycan iqtisadiyyatında qazanılmış uğurlardan danışmışdır.
Hesabat dövründə bilavasitə rayonda görülmüş işlərdən bəhs edən natiq bildirmişdir ki, Qubanın inkişafı daim dövlət rəhbərinin diqqət mərkəzindədir. Bunun nəticəsidir ki, rayona investisiya axını güclənmiş, yeni sosial obyektlər, istirahət guşələri, turizm obyektləri tikilməyə başlamışdır. Bələdiyyələrin köməkliyi və daxili imkanlar hesabına 42,4 kilometrlik kəndarası yollar, 1 körpü təmir edilmiş, 3 kilometr yol, habelə Quba-Xınalıq yolu asfaltlaşdırılmışdır. Şəhərin küçə və parkları abadlaşdırılmışdır.
İcra hakimiyyətinin başçısı məlumat vermişdir ki, 9 ayda iqtisadiyyatın aparıcı sahələrinə diqqət artırılmış, ümumi məhsul buraxılışı ötən ilin müvafiq dövrü ilə müqayisədə 12,9 faiz, bir nəfərə düşən məhsulun həcmi 11,4 faiz artmış, orta aylıq əmək haqqı 119 manat olmuşdur. Sonuncu rəqəm ötən ilin göstəricisindən 42 manat çoxdur. Qarabağ müharibəsi əlilləri və şəhid ailələri üçün dövlət vəsaiti hesabına 30 mənzilli yaşayış binası, 52 saylı Quba Seçki Dairəsi, 53 saylı Quba-Qusar Seçki Dairəsi dairə seçki komissiyalarının inzibati binaları, kəndlərdə 11 ticarət obyekti, 2 feldşer-mama məntəqəsi tikilmişdir. Hazırda şəhərdə Fətəlixan meydanı yaradılır, Dədə Qorqud meydanı, “Soyqırım” abidəsi yenidən qurulur. “Unibank” və “Standardbank”ın Quba filiallarının tikintisi başa çatmaq üzrədir. II Nügədi, Alekseyevka kəndlərində şadlıq sarayları tikilir. Bərqov və Paşa oba kəndlərində klub binaları, Vəlvələ inzibati ərazi vahidində 2 dəyirman tikilib istifadəyə verilmişdir.
Rayon iqtisadiyyatının əsasını kənd təsərrüfatı təşkil edir, deyən məruzəçi bildirmişdir ki, hesabat dövründə 29108 ton taxil, 11753 ton kartof, 11340 ton tərəvəz, 69480 ton meyvə, 4535 ton ət, 28785 ton süd, 8 milyon 138 min ədəd yumurta, 354 ton yun istehsal olunmuşdur. Oktyabrın 1-ə rayonda 67073 baş iribuynuzlu mal-qara, 263868 baş davar olmuşdur.
Qeyd edilmişdir ki, hesabat dövründə sənaye məhsulunun inkişafı keçən ilin müvafiq dövrünə nisbətən 88,1 faiz, sənaye müəssisələrinin mənfəəti isə 3 min manat artmışdır.
Məruzəçi elektrik enerjisi və təbii qazla təminatın yaxşılaşdırılması istiqamətində görülmüş işlərdən, əhaliyə göstərilən nəqliyyat, rabitə, səhiyyə, ticarət və iaşə xidmətinin vəziyyətini təhlil etmiş, Böyük Vətən və Qarabağ müharibələri veteranlarına, əlillərinə, şəhid ailələrinə, qaçqınlara, məcburi köçkünlərə göstərilən qayğıdan söz açmışdır. Məlumat vermişdir 9 ayda 1751, o cümlədən 670 daimi iş yeri açılmışdır. Regionların sosial-iqtisadi inkişafı Dövlət Proqramı qəbul ediləndən bəri 11 min 821, o cümlədən 3 min 630 daimi iş yeri yaradılmışdır.
Tədbirdə çıxış edənlər xüsusi vurğulamışlar ki, qubalılar Nazirlər Kabinetinin iclasında Azərbaycan Respublikasının Prezidenti İlham Əliyevin qarşıya qoyduğu vəzifələrin həlli üçün səylərini əsirgəməyəcəklər.
Yığıncaqda Prezidentin İcra Aparatının məsul əməkdaşı İlham Əliyev iştirak etmişdir.
Bölmənin digər xəbərləri
