İDMAN
Qurban Qurbanov: Rəqibimiz yeni baş məşqçi ilə güclü heyət qurub
Bakı, 11 iyul, AZƏRTAC
Rəqib komandanın yeni baş məşqçisi güclü heyət qurub. “Olimpiya” komandasının oyunlarını izləmişəm, hər oyuna fərqli sistemlə çıxırlar.
AZƏRTAC xəbər verir ki, bu sözləri UEFA Çempionlar Liqasının birinci təsnifat mərhələsinin ilk matçında səfərdə Sloveniyanın “Olimpiya” (Lyublyana) komandasının qonağı olacaq Ağdamın “Qarabağ” futbol klubunun baş məşqçisi Qurban Qurbanov görüşdən əvvəl keçirilən mətbuat konfransında deyib.
Baş məşqçi bildirib: “Bizi çətin və maraqlı qarşılaşma gözləyir. Təbii ki, ilk oyundan sonra rəqibi daha yaxşı tanıyacağıq və cavab matçı daha asan olacaq. Həmişə demişəm ki, ən vacib oyunlar ilk mərhələnin qarşılaşmalarıdır. Bizim də bəzi problemlərimiz var, buna baxmayaraq, sərfəli nəticə qazanmağa çalışacağıq. Maraqlı və gərgin oyun olacağını düşünürəm”
Qeyd edək ki, “Olimpiya”-“Qarabağ” oyunu iyulun 11-də Lyublyana şəhərindəki “Stojice” stadionunda Bakı vaxtı ilə saat 22:00-da start götürəcək.