Qusarda tapdığı silahı satmaq istəyən və işlədiyi obyektdən oğurluq edən şəxslər saxlanılıblar
Bakı, 8 fevral, AZƏRTAC
Qusar rayon sakini, əvvəllər məhkum olunmuş Teymur Ağaməmmədov rayon Polis Şöbəsinin əməkdaşları tərəfindən keçirilən əməliyyat-axtarış tədbirləri nəticəsində saxlanılıb.
Daxili İşlər Nazirliyinin mətbuat xidmətinin Quba regional qrupundan AZƏRTAC-a verilən məlumata görə, həmin şəxsin üzərindən satmaq məqsədilə daşıdığı 1 “Kalaşnikov” markalı avtomat, 1 həmin silaha məxsus patron darağı və 30 güllə aşkar edilərək götürülüb.
Xaçmaz rayon sakini Ramazan Əliyev şöbə əməkdaşları tərəfindən keçirilən digər əməliyyat-axtarış tədbirləri zamanı saxlanılıb. Həmin şəxs ayrı-ayrı vaxtlarda kirayə qaldığı evdən və işlədiyi obyektdən soyuducu, televizor və pul oğurlamaqla zərərçəkmişlərə ümumilikdə 1512 (min beş yüz on iki) manat ziyan vurub.
Faktlarla bağlı Qusar Rayon Polis Şöbəsində cinayət işi başlanılıb və məhkəmənin qərarı ilə Teymur Ağaməmmədovun barəsində həbs, Ramazan Əliyevin barəsində isə polisin nəzarəti altına vermə qətimkan tədbiri seçilib.
Bölmənin digər xəbərləri
