Qusarın həvəskar futbol klubu superkubok qarşılaşmasının qalibi olub

10.07.2026 [11:08]
Çap et
A⁺ A^-

Quba, 10 iyul, AZƏRTAC

Qusarı təmsil edən həvəskar futbol klubu Şimal Regional Futbol Federasiyasının təşkilatçılığı ilə keçirilən superkubok qarşılaşmasının qalibi adını qazanıb.

AZƏRTAC-ın bölgə müxbiri xəbər verir ki, superkubok uğrunda matçda Qusar rayonunun çempionu “Quxuroba” ilə region birinciliyinin qalibi adını qazanmış “Qadaşoba” (Xaçmaz) komandaları üz-üzə gəliblər.

Quba Olimpiya İdman Kompleksində keçirilən qarşılaşmada "Quxuroba" komandası 5:3 hesablı qələbə qazanaraq çempion olub.

Mükafatlandırma mərasimində Qusar Rayon İcra Hakimiyyətinin başçısı Sahir Məmmədxanov, Quba-Xaçmaz Regional Gənclər və İdman İdarəsinin rəisi Qumru Məmmədova çıxış edərək qalibləri təbrik edib, ölkəmizdə idman sahəsində əldə olunan uğurlardan danışıblar.

Qalib komandaya Şimal Regional Futbol Federasiyası tərəfindən kubok və diplomlar təqdim edilib.

_{Müxbir - Elxan Yusifli}