RADİKAL MÜXALİFƏTİN HƏRƏKƏTLƏRİ GÜRCÜSTAN İQTİSADİYYATINA MƏNFİ TƏSİR GÖSTƏRİR

20.11.2003 [22:46]
Çap et
A⁺ A^-

AZƏRTAC-ın müxbiri Tbilisidən xəbər verir ki, Gürcüstan parlamentinə noyabrın 2-də keçirilən seçkilərlə bağlı radikal müxalifətin paytaxtda və digər bölgələrdə təşkil etdiyi etiraz aksiyalarının, xüsusən də itaətsizliyə çağırışlarının ölkə iqtisadiyyatına mənfi təsiri artıq özünü göstərməkdədir. Bu, ilk növbədə, məhsulun ixrac və idxalına, istehsalına və milli valyutanın alıcılıq qabiliyyətinə dəyən zərərdə hiss olunmaqdadır. Çörəyin qiyməti bahalaşmış, larinin məzənnəsi kəskin şəkildə aşağı düşmüşdür. Müəssisələrin əksəriyyətinə xammal göndərilməsi ya tamamilə dayandırılmışdır, ya da baha qiymətə, özü də fasilələrlə göndərilir.

Gürcüstan dəmir yolu, Rustavi metallurgiya kombinatı, Bolnisidəki Madneuli kombinatı, Gürcüstan avtomobil nəqliyyatı idarəsi, Tbilisi metropoliteni və onlarca digər müəssisələrin kollektivləri Prezident Eduard Şevardnadzeyə və müxalifət partiyalarının liderlərinə açıq məktub göndərərək, son günlər baş verən hadisələrdən təəssüfləndiklərini bildirir, hər iki tərəfi bir-birinə güzəştə gedib, milli mənafeləri hər şeydən üstün tutaraq, mövcud böhrandan çıxmaq üçün yollar axtarmağa çağırırlar. Onlar xəbərdarlıq edirlər ki, əks təqdirdə ölkədə sabitlik qarşıdurma ilə əvəz oluna bilər. Gürcüstan qarşıdurmanın dadını ötən əsrin 90-cı illərinin əvvəllərində görmüşdür və bu gün də həmin ağrılarla yaşayır.

RADİKAL MÜXALİFƏTİN HƏRƏKƏTLƏRİ GÜRCÜSTAN İQTİSADİYYATINA MƏNFİ TƏSİR GÖSTƏRİR

MÜƏLLİFLƏ ƏLAQƏ

Bölmənin digər xəbərləri