Rəngini dəyişən avtomobil istehsal olunacaqdır
Bakı, 15 noyabr (AZƏRTAC). Hər zaman yeni ideyaları ilə müştərilərini təəccübləndirməyi bacaran “Toyota Motor” şirkəti şərti olaraq Toyota FV2 adlanan avtomobil istehsal etməyi planlaşdırır. Sahibinin üz ifadələrinə əsasən rəngini dəyişə bilən buqələmun tipli avtomobil modelinin bu ay “Tokio Motor Şou”da sərgilənməsi nəzərdə tutulmuşdur. Mimika və səs tanıma robotlarının istehsalı üçün artıq mühəndislərə müraciət edilmişdir.
Beləliklə, Toyota yol qəzalarının qarşısını almağa kömək edən, özünü idarəetmə imkanına malik, kompyuter dəstəkli “ağıllı” avtomobillər sırasına qoşulur.
Toyota məhsul planlaşdırma qrupunun meneceri Takeo Moriai bildirmişdir ki, avtomobil kiçik yaşlarından smartfon və iPad istifadəçisi olan “rəqəmsal nəsil” istehlakçıları üçün istehsal olunacaqdır. Qeyd edək ki, 2015-ci il ərəfəsində “Tokio Motor Şou”da hidrogen dəstəkli avtomobilin ilkin versiyası da təqdim ediləcəkdir. Dizayn seçimi zamanı şirkət katamaranın görünüşü və axar sudan bəhrələnmişdir. Yeni avtomobil noyabrın 23-dən dekabrın 1-dək davam edəcək sərgidə nümayiş etdiriləcəkdir.
Bölmənin digər xəbərləri
