Respublika elmi ifaçılıq müsabiqəsi Qara Qarayevin xatirəsinə ithaf edilib
Bakı, 16 mart, AZƏRTAC
Aprelin 2-də Üzeyir Hacıbəyli adına Bakı Musiqi Akademiyasında (BMA) görkəmli bəstəkar, Xalq Artisti Qara Qarayevin 100 illiyinə həsr olunmuş pianoçuların V Respublika elmi ifaçılıq müsabiqəsi keçiriləcək.
BMA-dan AZƏRTAC-a bildirilib ki, akademiyanın rektoru, professor Fərhad Bədəlbəylinin rəhbərlik etdiyi müsabiqə aprelin 9-dək davam edəcək. Müsabiqənin münsiflər heyətində BMA-nın professorları ilə yanaşı, Qara Qarayevin qızı, İstanbul Dövlət Texniki Universitetinin Türk Klassik Musiqisi Dövlət Konservatoriyasının İspirtoxane Mədəniyyət və Sənət Mərkəzinin fortepiano şöbəsinin müdiri Züleyxa Qarayeva-Bağırova da təmsil olunacaq.
Qeyd edək ki, bu, BMA-nın eksperimental laboratoriyası olan məktəb-studiyanın bazasında professor Tərlan Seyidov tərəfindən işlənilmiş proqram əsasında yeni elmi-ifaçılıq müsabiqəsidir. Müsabiqənin məqsədi təcrübənin ifaçılıq nəzəriyyəsi ilə əlaqələndirilməsi və geniş profilli musiqiçinin kompleksli inkişafının təkmilləşdirilməsidir.
Müsabiqənin şərtinə əsasən hər bir iştirakçı ifa etdiyi proqramın məruzəsi ilə çıxış edəcək.
Bölmənin digər xəbərləri
