“Respublika Gənclər Debat Forumu: Yaz 2018”in qalibləri mükafatlandırılıb
Bakı, 1 iyun, Həsrət Mahmudova, AZƏRTAC
Gənclər və İdman Nazirliyinin, “Vətəndaş Cəmiyyətində Debat” İctimai Birliyinin birgə təşkilatçılığı ilə keçirilən “Respublika Gənclər Debat Forumu: Yaz 2018” layihəsinə iyunun 1-də yekun vurulub.
AZƏRTAC xəbər verir ki, layihənin Azərbaycan Universitetində keçirilən final mərhələsi və mükafatlandırma mərasimi Azərbaycan Respublikasının dövlət himninin səsləndirilməsi ilə başlayıb.
Tədbirdə “Respublika Gənclər Debat Forumu: Yaz 2018” layihəsinin videohesabatı təqdim olunub.
Sonra “Bakı Gənclər Debat Forumu: Yaz Kuboku-2018”in final mərhələsi keçirilib. Forumun Azərbaycan bölməsi üzrə finalına vəsiqə qazanmış Bakı Dövlət Universitetinin “Əlqərəz” və Azərbaycan Dövlət İqtisad Universitetinin “Dollara manat” debat klubları həyəcan dolu intellektual oyun nümayiş etdiriblər. Daha inamlı təsir bağışlayan “Dollara manat” komandası qalib gələrək “Bakı Gənclər Debat Forumu: Yaz 2018”in kubokunu qazanıb. Bakı Dövlət Universitetinin “Triada” komandası isə rus bölməsi üzrə “Bakı Gənclər Debat Forumu: Yaz 2018”in kubokunu qazanıb.
Final oyunundan sonra tədbir rəsmi hissə ilə davam edib.
Tədbirdə çıxış edən gənclər və idman nazirinin müavini İntiqam Babayev qalib gələn gənclərə təbriklərini çatdırıb, 2018-ci ilin Azərbaycan üçün əlamətdar il olduğunu bildirib. Bu il ulu öndər Heydər Əliyevin anadan olmasının 95, Azərbaycan Xalq Cümhuriyyətinin yaradılmasının 100 illik yubileylərinin ölkəmizin bütün bölgələrində, eləcə də xaricdə yaşayan azərbaycanlılar tərəfindən təntənə ilə qeyd olunduğunu vurğulayan İ.Babayev bu cür zəka oyunlarının gənclərin intellektual biliklərinin artırılmasındakı rolundan danışıb.
“Vətəndaş Cəmiyyətində Debat” İctimai Birliyinin sədri Ələkbər Mustafayev çıxışında debat forumunun gənclərin inkişafında önəmini vurğulayaraq, bu layihəyə qatılan gənclərin sayının ildən-ilə artdığını bildirib. Qeyd edib ki, debat forumlarının iştirakçıları gələcəkdə müxtəlif sahələrdə həm ölkə, həm də beynəlxalq miqyaslı yarışlarda ölkəmizi layiqincə təmsil edə, Azərbaycanın maraqlarını qoruya bilərlər. İndiyədək keçirilən forumlarda ölkə üçün aktual olan mövzularda, o cümlədən iqtisadiyyat, ekologiya, multikulturalizm və digər sahələrlə bağlı müzakirələr aparılıb, gənclər öz mövqelərini əsaslandırıblar.
Azərbaycan Universitetinin prorektoru Yusif Qasımov, Yeni Azərbaycan Partiyası Gənclər Birliyinin sədri Seymur Orucov, Prezident Administrasiyasının gənclər siyasəti və idman məsələləri şöbəsinin məsul əməkdaşı Kənan Firdovsioğlu, Azərbaycan Respublikası Gənclər Fondunun aparat rəhbəri Faiq Qürbətov qalib komandaları təbrik edib, bu cür intellektual oyunların önəmini diqqətə çatdırıblar. Bildirilib ki, bu gün Azərbaycanda dövlət gənclər siyasətinin inkişafı, gənclərin maraqlarının təmin olunması, onların idarəçilik sistemində önə çəkilməsi, hüquqlarının qorunması dövlətimizin başçısı İlham Əliyevin diqqət mərkəzindədir. Azərbaycanın gənclər siyasəti dünyada uğurlu model kimi qəbul olunur.
Tədbirdə məlumat verilib ki, “Vətəndaş Cəmiyyətində Debat” İctimai Birliyi (DVC) Milli Debat Proqramı çərçivəsində Gənclər və İdman Nazirliyinin dəstəyi ilə hər il mütəmadi olaraq “Respublika Gənclər Debat Forumu” təşkil edir. Ölkənin 11 regionunu (Bakı, Sumqayıt, Gəncə, Şəki, İsmayıllı, Qusar, Lənkəran, Mingəçevir, Şəmkir, Ağdam və Sabirabad rayon və şəhərləri) əhatə edən forum 1000-dən çox gənci özündə birləşdirir. Hər bir regionun ali təhsil müəssisələrində təlimlərlə yanaşı, daxili və regional turnirlər keçirilir. Adları çəkilən rayon və şəhərlərdə gənc debatçılar ölkəmiz üçün prioritet olan müxtəlif aktual mövzularda problemləri araşdıraraq debatlar aparırlar. Bu il Azərbaycan Xalq Cümhuriyyətinin yaranmasının 100-cü ildönümünə həsr olunan “Respublika Gənclər Debat Forumu: Yaz 2018” çərçivəsində Bakıda və 11 regional nümayəndəlikdə 1000 gəncin iştirakı ilə təqdimat, təlim, turnir və forumlar keçirilib.
Çıxışlardan sonra qalib komandalar və ən yaxşı natiqlər mükafatlandırılıblar. Həmçinin “Respublika Gənclər Debat Forumu: Yaz 2018” layihəsində fəal iştirak etmiş, Milli Debat Proqramının regional nümayəndəlikləri olan Mingəçevir, Gəncə, Şəki, Lənkəran, Biləsuvar, Sabirabad və Sumqayıt debat mərkəzlərinin nümayəndələrinə mükafatlar verilib.
Bundan başqa, Vətəndaş Cəmiyyətində Debat” İctimai Birliyi tərəfindən həyata keçirilən layihələrin geniş işıqlandırılmasında fəallıq göstərən bir qrup media təmsilçisinə “Təşəkkürnamə”lər təqdim olunub.
Təltif olunanlar arasında AZƏRTAC-ın əməkdaşı Həsrət Mahmudova da var.
Bölmənin digər xəbərləri
