RESPUBLİKADA TAXIL YIĞIMI REKORD HƏDDƏ ÇATMIŞDIR
Respublikada taxıl biçini başa çatmış, 863 min 419 hektar sahədən 2 milyon 318 min 424 ton taxıl, o cümlədən 1 milyon 670 min 436 ton buğda yığılmışdır. Bu isə ölkə əhalisinin ərzaq buğdasına tələbatının 80-85 faizi deməkdir.
Kənd Təsərrüfatı Nazirliyinin mətbuat xidmətindən AZƏRTAC-a bildirmişlər ki, cari ildə Azərbaycanda istehsal edilən taxılın həcmi rekord həddə çatmışdır. Ötən ilin müvafiq dövrü ilə müqayisədə bu il 500 min ton çox taxıl, o cümlədən 350 min ton artıq buğdanın toplanması ərzaq təhlükəsizliyinə etibarlı təminat verir.
Azərbaycan Prezidentinin “Kənd təsərrüfatı məhsulları istehsalçılarının toxum, gübrə və damazlıq heyvanları ilə təmin edilməsinə əlavə dəstək verilməsi barədə” Sərəncamı kənd təsərrüfatının, eləcə də taxılçılığın inkişafında yeni mərhələ açacaqdır. Bu ilin payızında 620 min hektar sahədə taxıl əkilməsi nəzərdə tutulmuşdur.
Bölmənin digər xəbərləri
