Rəvan Həsənov: Zəfər Günü Azərbaycanın suverenliyinin, gücünün və qüdrətinin rəmzidir
Bakı, 7 noyabr, AZƏRTAC
Noyabrın 7-də Bakı Beynəlxalq Multikulturalizm Mərkəzində (BBMM) 8 Noyabr - Zəfər Gününə həsr edilən tədbir keçirilib.
Mərkəzin mətbuat xidmətindən AZƏRTAC-a verilən məlumata görə, Azərbaycanın Dövlət Himninin səsləndirilməsi ilə başlayan tədbirdə Vətən uğrunda canından keçmiş şəhidlərimizin xatirəsi bir dəqiqəlik sükutla yad edilib. BBMM tərəfindən hazırlanan “Biz birlikdə güclüyük” sənədli filmi nümayiş olunub.
Tədbirdə çıxış edən BBMM-in icraçı direktoru Rəvan Həsənov bildirib ki, 44 günlük Vətən müharibəsində qazanılan Zəfər dövlətçilik tariximizin ən şanlı səhifələrindən biridir. Azərbaycan Müzəffər Ali Baş Komandan, Prezident İlham Əliyevin liderliyi ilə son 200 ilin ən böyük Qələbəsini qazandı. Bu Qələbə hər bir azərbaycanlı üçün sonsuz qürur mənbəyidir və tariximizdə əbədi qalacaq. Zəfər Günü Azərbaycanın dövlət müstəqilliyinin, suverenliyinin, gücünün və qüdrətinin rəmzidir. Rəvan Həsənov diqqətə çatdırıb ki, Vətən müharibəsindəki Zəfərimizin arxasında duran ideya birlik, qardaşlıq idi. Çünki torpaqlarımızın azadlığı, ölkəmizin ərazi bütövlüyü və suverenliyi uğrunda mübarizədə dinindən, dilindən, mədəniyyətindən asılı olmayaraq, hər kəs “Dəmir yumruq” ətrafında birləşdi.
Digər çıxış edənlər - Qafqaz Müsəlmanları İdarəsi sədrinin müavini Fuad Nurullayev, Bakı Dağ Yəhudiləri Dini İcmasının rəhbəri Milix Yevdayev, AMEA Fəlsəfə və Sosiologiya İnstitutunun aparıcı elmi işçisi, İkinci Qarabağ müharibəsi qazisi Radif Mustafayev, Azərbaycan İlahiyyat İnstitutunun Elm və İnnovasiyalar üzrə prorektoru Mirniyaz Mürsəlov, Azərbaycanda Katolik Kilsəsinin Apostol Prefekti Yepiskop Vladimir Fekete, Azərbaycan Silahlı Qüvvələrinin kapitanı, İkinci Qarabağ müharibəsinin iştirakçısı, Vətən Müharibəsi Qəhrəmanı Ramazan Hudulov, Rus Pravoslav Kilsəsinin Bakı Yeparxiya İdarəsinin katibi protoiyerey Mefodiy Elnur Əfəndiyev, Avropa Yəhudilərinin Bakı dini icmasının sədri Şneor Seqal, Alban-Udi Xristian Dini İcmasının sədri Robert Mobili, Gürcü yəhudiləri icmasının ravvini Zamir İsayev, “Samur” Ləzgi Milli Mərkəzinin sədri İmran Rzayev, Talış icmasının ağsaqqalı İmamverdi Həmidov, “Azərbaycan-Avar” İctimai Birliyinin sədri Məhəmməd Nooyev və Qazi İsmail Hetayev Azərbaycanda yaşayan milli-dini icmaların nümayəndələrinin bir yerdə və həmrəy olduqlarını vurğulayıblar. Qeyd olunub ki, Azərbaycan dövləti öz siyasətində multikultural dəyərləri hər zaman əsas götürüb.
Bölmənin digər xəbərləri
