ROMA PAPASI BMT-DƏ İNSAN HÜQUQLARI MÖVZUSUNDA ÇIXIŞ EDƏCƏKDİR
AZƏRTAC xarici KİV-lərə istinadla xəbər verir ki, aprelin 15-20-də ABŞ-da səfərdə olacaq Roma Papası XVI Benedikt Nyu-Yorkda, Birləşmiş Millətlər Təşkilatının iqamətgahında insan hüquqları mövzusunda çıxış edəcəkdir.
Vatikanın mətbuat katibi Federiko Lombardi demişdir ki, pontifik çıxışını BMT-nin Ümumdünya İnsan Hüquqları Bəyannaməsi qəbul etməsinin 60-cı ildönümünə həsr edəcəkdir.
Roma Papası səfər çərçivəsində Vaşinqtonda da olacaqdır. O, səfər ərəfəsində Amerika xalqına telemüraciətini Amerika prezidentləri kimi “God Bless America” (“Ya Rəbb, Amerikaya yardımçı ol”) sözləri ilə bitirmişdir.
Səfərin dini xarakter daşıyacağını vurğulayan mətbuat katibi bildirmişdir ki, pontifik ABŞ-da katolik kilsəsinin fəaliyyəti ilə hərtərəfli tanış olacaq, Nyu-York sinaqoquna gedəcəkdir.
Lombardinin sözlərinə görə, Roma Papası 2001-ci il sentyabrın 11-də Dünya Ticarət Mərkəzində baş vermiş faciə yerində də olacaqdır.
XVI Benedikt ABŞ-a səfəri zamanı 61 yaşını, habelə Roma Papası seçilməsinin üçüncü ildönümünü qeyd edəcəkdir.
Bölmənin digər xəbərləri
