ROMA PAPASININ TÜRKİYƏYƏ SƏFƏRİ DAVAM EDİR

29.11.2006 [20:23]
Çap et
A⁺ A^-

AZƏRTAC-ın xüsusi müxbiri xəbər verir ki, Roma Papası XVI Benedikt noyabrın 29-də Türkiyə Prezidenti Əhməd Necdət Sezər və Baş nazir Rəcəb Tayyib Ərdoğanla keçirdiyi görüşlərdən məmnun olduğunu dilə gətirmişdir. Mehriban qarşılanmadan razı qalan katolik kilsəsinin başçısı, Türkiyənin Avropa İttifaqına üzvlüyünü dəstəklədiyini və Mədəniyyətlər İttifaqı Proqramının əhəmiyyətini qeyd etmişdir.

Ankaradakı görüşlərini başa vuraraq noyabrın 29-da İzmirə yola düşən Papanı Türkiyə XİN-in protokol müdiri Oya Tuzcuoğlu müşayiət edəcəkdir.

İzmirin Adnan Menderes hava limanında XVI Benedikti şəhər valisi, bələdiyyə başqanı, hərbçilər qarşılamışlar. Vali İzmirin EXPO 2015 Beynəlxalq sərgisinə ev sahibliyi etməyə namizəd olduğunu bildirərək, Papadan bu məsələdə yardımçı olmağı xahiş etmişdir. XVI Benedikt İzmirdə olmaqdan məmnunluğunu söyləyərək, Türkiyənin beynəlxalq əlaqələrdə böyük rol oynadığını qeyd etmişdir. Sonra Papa Selcuk şəhərindəki Müqəddəs Məryəm kilsəsində ibadət etmişdir.

Həmin gün axşam Roma Papası İstanbula yola düşmüşdür. O, noyabrın 30-da burada Fənər Rum Patriarxlığını ziyarət edəcək, buradakı ibadətdə iştirak edəcək, eyvandan xalqı salamlayaraq, müraciət oxuyacaqdır. Roma Papası XVI Benedikt, həmçinin Ayasofiya muzeyi və Sultanəhməd məscidi ilə də tanış olacaqdır.

ROMA PAPASININ TÜRKİYƏYƏ SƏFƏRİ DAVAM EDİR

MÜƏLLİFLƏ ƏLAQƏ

Bölmənin digər xəbərləri