RUMINİYANIN SABİQ BAŞÇISININ QIZI VƏFAT ETDİ
Ehtimal olunduğuna görə, xəstəliyin kəskinləşməsinin səbəblərindən biri bununla bağlıdır ki, ölkənin hakimiyyət orqanları Zoya Çauşeskunun atasının və anası Yelenanın məzarlarının ekshumasiyası barədə onun çoxsaylı xahişlərinə rədd cavabı verirdilər. Edam olunmuş Çauşeskuların qızı valideynlərinin öldürülməsi və harada torpağa tapşırılması barədə həqiqəti öyrənmək üçün son illər müvafiq tələblərlə Rumıniya prokurorluğuna, məhkəmə orqanlarına və Milli Müdafiə Nazirliyinə dəfələrlə müraciət etmişdi.
Zoya Çauşeskunun razılaşmadığı rəsmi məlumata görə, onun atası 1989-cu ildə inqilab zamanı Buxarestdə, Telemərkəzin qarşısında mitinq keçirən kütlədən xilas olmaq üçün vertolyotda paytaxtdan qaçmışdır. O, qaçışını arvadı Yelena ilə avtomobildə davam etdirmiş, lakin tezliklə Torqovişta şəhərciyində ordu tərəfindən tutulmuşdur. Elə oradaca təşkil olunan tribunalın hökmü ilə ər-arvad güllələnməyə məhkum edilmişdir.
Onların üç övladı – Zoya, Niku və övladlığa götürdükləri Valentin 1989-cu ilin dekabr hadisələrindən dərhal sonra həbs olunmuşlar. Niku soyqırımında, Zoya və Valentin milli iqtisadiyyatı dağıtmaqda təqsirləndirilmişlər. 1990-cı ilin əvvəllərində onlar azadlığa buraxılmışlar. Bu ilin oktyabrında, Çauşeskunun hakimiyyəti devrildikdən təxminən 17 il sonra Rumıniya məhkəməsi onların müsadirə olunmuş əmlakını onun övladlarına qaytarmışdır.
Niku hələ 1996-cı ildə Vyana klinikalarından birində diabetdən və qaraciyər sirrozundan ölmüşdür. Valentin tanınmış fizikdir, vətəndə yaşayır, onu tez-tez ABŞ-a mühazirə oxumağa dəvət edirlər.
Onların böyük bacısının harada dəfn ediləcəyi hələlik məlum deyildir. Zoya Çauşeskunun vəsiyyətinə əsasən, onun meyidini kremasiya edəcəklər.
Bölmənin digər xəbərləri
