RUSİYA AZƏRBAYCANLA ENERGETİKA SAHƏSİNDƏ ƏMƏKDAŞLIQDAN RAZIDIR
Rusiyanın energetika naziri İqor Yusufov AZƏRTAC-ın müxbiri ilə məxsusi müsahibəsində bildirmişdir: “Rusiya Azərbaycanla energetika sahəsində əməkdaşlığı çox yüksək qiymətləndirir”. Nazirin sözlərincə, Azərbaycan onun neftinin Rusiya ərazisi ilə nəqli sahəsində Rusiya üçün önəmli ölkədir və prezidentlərimiz arasında əldə olunmuş razılaşmalar çox əhəmiyyətlidir. Bu razılaşmalar Azərbaycan neftinin Novorossiysk limanı vasitəsilə ixracına dair uzunmüddətli dövlətlərarası sazişlərdə öz əksini tapmışdır.
Cənab Yusufov həmçinin demişdir ki, Rusiya Xəzərin dibinin bölünməsi haqqında dövlət başçılarının bu yaxınlarda imzaladıqları sazişə və Xəzərdə zəngin neft ehtiyatları olan Yalama-Samur sahəsinin birgə işlənilməsi haqqında razılaşmaya böyük əhəmiyyət verir. “LUKoyl” şirkəti həmin sahənin işlənilməsində Rusiya tərəfindən iştirak etmək niyyətindədir. Onun bu layihədə iştirakı haqqında qərar indi Rusiya hökumətində hazırlanır və tezliklə təqdim ediləcəkdir.
İ.Yusufov iki ölkə arasında yanacaq-energetika sahəsində əməkdaşlığın perspektivlərindən danışaraq bildirmişdir ki, Rusiyadan Azərbaycana göndərilən qazın həcminin artırılması üçün hər iki tərəfin perspektiv imkanları var, çünki Azərbaycan iqtisadiyyatında qaza tələbat güclənir, Rusiya isə lazımi həcmdə qaz təklif edə bilər. İndi Rusiyanın “Qazprom” şirkəti bu işin həyata keçirilməsinə hazırlaşır və həmin istiqamətdə ikitərəfli danışıqlar aparılır.
Nazir iki ölkənin enerji sistemlərinin işinin birləşdirilməsi baxımından elektroenergetika sahəsində əməkdaşlıq üçün də çox böyük imkanlar olduğunu vurğulamışdır.
Rusiyanın energetika naziri bu sahədə MDB çərçivəsində daha sıx əməkdaşlığın zəruri olduğunu söyləyərək demişdir: “Əgər bütün MDB dövlətləri Yanacaq-Energetika Kompleksi Şurası yaradılması barədə razılığa gəlsələr, onda Rusiya da, digər ölkələr də gələcəkdə öz enerji təhlükəsizliyini təmin edə bilərlər.
Asya Hacızadə
AZƏRTAC-ın xüsusi müxbiri
Moskva
Bölmənin digər xəbərləri
