İQTİSADİYYAT
Rusiya Bakıda keçiriləcək COP29 konfransına hazırlaşır
![Rusiya Bakıda keçiriləcək COP29 konfransına hazırlaşır](/files/2024/1/1200x630/17078256072081122032_1200x630.jpg)
Moskva, 13 fevral, AZƏRTAC
Rusiya 2024-cü ilin noyabrında Azərbaycanda keçiriləcək BMT-nin COP29 iqlim konfransına ( BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyasına) hazırlaşır.
AZƏRTAC xəbər verir ki, bu barədə Rusiyanın iqtisadi inkişaf naziri Maksim Reşetnikov Rusiya Biznes Həftəsi çərçivəsində keçirilən İqlim Forumunun sessiyasında bildirib.
Rusiyalı nazir əlavə edib ki, COP29-da qazıntı yanacağının gələcəyi ilə bağlı əldə olunmuş razılaşmalara yenidən baxılmasına yol verməmək, “ədalətli enerji keçidi” məntiqinə əməl etmək çox vacibdir.
M.Reşetnikovun sözlərinə görə, qarşıdakı iqlim konfransında Rusiyanın başlıca prioritetlərindən biri maliyyə gündəliyi olacaq. Hansı layihələrin “yaşıl” hesab ediləcəyini, onların hansı alətlərin köməyi ilə dəstəklənəcəyini həll etmək planlaşdırılır.
Nazir sonda qeyd edib ki, Rusiya hökuməti iqlim gündəliyi ilə fəal şəkildə məşğul olur.
Fəridə Abdullayeva
AZƏRTAC-ın xüsusi müxbiri
Moskva