RUSİYA FEDERASİYASI HÖKUMƏTİ SƏDRİNİN MÜAVİNİ BAKIYA GƏLMİŞDİR
Rusiya Federasiyası hökuməti sədrinin müavini Viktor Xristenko aprelin 9-da Bakıya gəlmişdir. Binə hava limanında hörmətli qonağı və onun başçılıq etdiyi nümayəndə heyətini Azərbaycan baş nazirin birinci müavini Abbas Abbasov, Rusiya Federasiyasının Bakıdakı səfiri Nikolay Ryabov, digər rəsmi şəxslər qarşılamışlar.
Viktor Xristenko jurnalistlərin suallarına cavab verərək bildirdi ki, energetika sahəsində əməkadşlıq məsələləri Azərbaycan-Rusiya hökumətlərarası iqtisadi əməkdaşlıq komissiyasının aprelin 10-da Bakıda açılan 6-ci iclasında əsas məsələlərdən biri olacaqdır.
Onun dediyinə görə, Azərbaycan neftinin Rusiya ərazisi ilə tranziti və Rusiya qazının Azərbaycana göndərilməsi haqqında mövcud sazişlər müzakirə ediləcəkdir. Rusiya hökuməti sədrinin müavini bidirdi ki, indi Azərbaycan neftinin tranzitinə dair yeni uzunmüddətli saziş hazırlanır və bu sənəddə Bakı-Novorossiysk boru kəməri ilə azı on il neft əqil edilməsi nəzərdə tutulacaqdır. Neftin tranziti haqqında əvvəlki sazişin müddəti 2003-cü ilin yanvarında bitir.
Viktor Xristenko dedi: “Biz göndəriləcək neftin həcmi, keyfiyyəti, nəqletmə tarifləri daxil olmaqla, bütün məsələləri kompleks şəkildə müzakirə etməyə hazırıq və Azərbaycan tərəfindən razılıq olacağına ümid bəsləyirik”. Bu il Azərbaycan şimal istiqamətində 2,5 milyon ton neft nəql edəcək və Rusiyadan 4 milyard kubmetr qaz alacaqdır.
Komissiyanın iclasında 11 məsələyə, o cümlədən nəqliyyat və rabitə, əmlak məsələlərinin tənzimlənməsi, RF subyektləri ilə regional əməkdaşlığın genişləndirilməsi, habelə iki ölkə arasında ticarət- iqtisadi münasibətlərin vəziyyəti və onların inkişaf etdirilməsi perspektivləri ilə bağlı məsələlərə baxılacaqdır. 2010-cu ilədək dövrdə Azərbaycan ilə Rusiya arasında uzunmüddətli iqtisadi əməkdaşlıq proqramının həyata keçirilməsinə dair tədbirlər planını təsdiqləmək də nəzərdə tutulur.
Bölmənin digər xəbərləri
