RUSİYA PAYTAXTININ METROPOLİTENİNDƏ “ÇİTAYUŞŞAYA MOSKVA”
AZƏRTAC İTAR-TASS agentliyinə istinadla xəbər verir ki, mayın 31-dən etibarən Rusiya paytaxtının metropolitenində “Çitayuşşaya Moskva” yeni metro qatarı hərəkət etməyə başlamışdır. Qatarın vaqonları məşhur ədəbi qəhrəmanların təsvirləri, kitab illüstrasiyalarının reproduksiyaları və ədəbi əsərlərdən parçalarla bəzədilmişdir.
Həmin gün səhər “Vorobyovı qorı” stansiyasına Moskva Dövlət Universiteti tərəfdən girişin qarşısındakı meydançada Moskva məktəbliləri ilə uşaq yazıçıları, şairlər və artistlərin görüşü olmuşdur. Günortaya yaxın qatar “Kropotkinskaya” stansiyasına yola düşmüşdür. Oradan uşaqları Yeni Arbatdakı Moskva kitab evinə aparmışlar. Burada onlar üçün bayram proqramı hazırlanmışdı.
Moskva metropoliteni xətlərində hərəkət edən digər dörd “firma qatarında” olduğu kimi, yeni qatarda da reklam yoxdur, hər bir vaqonun tərtibatı isə müəyyən ədəbi mövzuya uyğundur. Birinci vaqon rus xalq nağıllarına və dastanlarına həsr edilmişdir. Sərnişinlər bu vaqonun divarlarında folklor nümunələrindən parçalar oxumaq, əfsanəvi qəhrəmanların, Qoğalın, Şahzadə İvanın təsvirlərinə tamaşa etmək imkanına malikdirlər. İkinci vaqonda rus klassiklərinin personajları üstünlük təşkil edir. Vaqonun tərtibatında, məsələn, Nikolay Qoqolun “Müfəttiş” əsərinin motivlərindən istifadə edilmişdir. Üçüncü vaqon heyvanlar və təbiət haqqında kitabları xoşlayan sərnişinlər üçün daha maraqlı olacaqdır. Onlar burada Qarşinin Səyahətçi Qurbağa, Mamin-Sibiryakın Bozboyun Ördək və başqa personajların təsvirlərini görəcəklər. Metronun ən balaca sərnişinləri onlar üçün nəzərdə tutulmuş dördüncü vaqonun divarlarında Doktor Aybolit, Milçək-vizilçək, Qoca Xottabıç və Neznaykanın şəkillərini görəcəklər. Yeniyetmələr üçün nəzərdə tutulan beşinci vaqon “Əyri güzgülər krallığı”, “Timur və onun komandası”, başqa ədəbi əsərlərin motivləri əsasında tərtib edilmişdir. Qatarın axırıncı vaqonu xarici yazıçıların əsərlərinə həsr edilmişdir. Burada Antuan de Sent-Ekzüperi, Mark Tven, Jül Vern, Herbert Uels, Amadey Hofman və başqa yazıçıların əsərlərinin motivləri təsvir edilmişdir.
“Çitayuşşaya Moskva” qatarı paytaxt metrosunda beşinci firma qatarı olacaqdır. “Akvarel” adlı bədii qalereya qatarı, məşhur “Moskva-Sankt-Peterburq” ekspressinin şərəfinə adlandırılmış “Krasnaya strela”, həmçinin “Kurskaya duqa” və “Narodnıy opolçenets” qatarları artıq xeyli vaxtdır ki, istifadəyə verilmişdir.
