RUSİYA VƏ TÜRKİYƏ BEYNƏLXALQ TERRORİZMLƏ MÜBARİZƏDƏ ƏMƏKDAŞLIĞI GENİŞLƏNDİRƏCƏKLƏR

17.09.2003 [18:07]
Çap et
A⁺ A^-

AZƏRTAC-ın İTAR-TASS agentliyindən aldığı xəbərə görə, yüksək səviyyədə Rusiya-Türkiyə müştərək işçi qrupunun Moskvada keçirilmiş ikigünlük iclasının yekunlarını RF XİN-də şərh edərək bildirmişlər: Rusiya ilə Türkiyə beynəlxalq terrorizmlə mübarizədə əməkdaşlıq sahəsində xarici siyasət idarələri arasında məsləhətləşmələri davam etdirmək barədə razılığa gəlmişlər.

İşçi qrupu “Avrasiyada RF ilə Türkiyə arasında əməkdaşlığın inkişafına dair fəaliyyət planı”na uyğun olaraq, 2001-ci il noyabrın 16-da yaradılmışdır. Qrupun həmsədrləri RF XİN başçısının müavini Sergey Razov və onun türkiyəli həmkarı Əli Tuyqandır.

İclas iştirakçıları ikitərəfli münasibətlərə dair məsələlər, aktual beynəlxalq və regional problemlər, ilk növbədə, Avrasiya regionunda hər iki dövlətin mənafeləri ilə bağlı problemlər barədə fikir mübadiləsi aparmışlar. Rusiya-Türkiyə münasibətlərinin müqavilə-hüquq bazasının təkmilləşdirilməsi üçün XİN-lər arasında məsləhətləşmələri davam etdirmək qərara alınmışdır.

Əli Tuyqan Rusiya xarici işlər naziri İqor İvanov və onun müavini Aleksandr Saltanovla görüşmüş, Yaxın Şərqdə vəziyyətin nizama salınması problemini və İraqda vəziyyəti müzakirə etmişlər.

Müştərək işçi qrupun növbəti iclası 2004-cü ilin birinci yarısında Ankarada keçiriləcəkdir.