CƏMİYYƏT
RUSTAVİ HƏBSXANASINDA KÜTLƏVİ QAÇIŞIN TƏŞKİLATÇISI YAXALANDI
Xəbər verildiyi kimi, sentyabrın 10-da axşam Rustavi şəhərindəki ciddi rejimli islah-əmək koloniyasından129 məhbus, o cümlədən bir qrup xüsusilə təhlükəli cinayətkar qaçmışdır. Bu, təkcə Gürcüstan tarixində deyil, ümumiyyətlə, bütün dünyada İƏK-dən ən kütləvi qaçışdır. Bundan əvvəl bu sahədə rekord braziliyalılara məxsus idi. 2002-ci ildə Braziliyada birdən-birə 90 məhbus həbsxanadan qaça bilmişdi.
AZƏRTAC-ın müxbirinin Gürcüstan Ədliyyə Nazirliyinin mətbuat mərkəzindən aldığı xəbərə görə, sentyabrın 12-də polis Rustavi həbsxanasından kütləvi qaçışın təşkilatçısını yaxalamışdır. Bu, Kutaisi sakini 20 yaşlı Besa Maruaşvilidir. O, quldurcasına basqınlara görə cəza çəkirdi. Qaçqın Qardabani rayonunda tutulmuşdur.
Həmin mənbə bildirmişdir ki, 129 qaçqından hələlik 59-u tapılıb həbs olunmuşdur. Qeyd edək ki, min nəfərdən çox cinayətkar və caninin cəza çəkdiyi Rustavi koloniyasından məhbuslar əvvəllər də dəstə-dəstə qaçmışdılar.