RÜŞVƏTXOR DÖVLƏT MƏMURU EDAM EDİLMİŞDİR

14.11.2003 [11:54]
Çap et
A⁺ A^-

AZƏRTAC Rusiyanın “Novosti” agentliyinə istinadla bildirir ki, Çinin şimalındakı Hebey əyalətində çox böyük məbləğdə rüşvət almaqda və ictimai fondların dağıdılmasında təqsirli sayılan yüksək vəzifəli vergi məmuru edam edilmişdir.

Hebey əyaləti Dövlət Vergi İdarəsinin keçmiş direktoru Li Çjenin işinin təhqiqatı təxminən 2 il çəkmişdir. Məhkəmə dinləmələri zamanı sübuta yetirilmişdir ki, məmur 8,15 milyon yuan (985 min ABŞ dolları) məbləğində rüşvət almış və 29,67 milyon yuan (3,59 milyon dollar) vəsaiti israf etmişdir ki, onun da 2,7 milyonunu (330 min dollar) mənimsəmişdir. Həbs olunarkən rüşvətxorun üstündən, təxminən 420 min dollar nağd pul tapılmışdır. Ölüm hökmü çıxarıldıqdan sonra cinayətkar yuxarı instansiyaya müraciət etmiş, lakin Ali Xalq Məhkəməsi hökmü dəyişməmişdir.

Çin qanunvericiliyinə əsasən, 5 milyon yuandan (təxminən 600 min dollar) çox rüşvət alanlara ölüm cəzası verilir.