DÜNYA
ŞAHMAT ÜZRƏ DÜNYA ÇEMPİONU UĞRUNDA MATÇIN MÜKAFAT FONDU BİR MİLYON DOLLARDIR
İyulun 25-də Ukrayna Dövlət İdman Komitəsinin sədri Nikolay Kostenko görüşün hazırlanması və keçirilməsi üzrə Təşkilat Komitəsinin iclasından sonra bu barədə məlumat verərək bildirmişdir ki, çempionatın keçirilməsi 1,7 milyon dollara başa gələcəkdir. Buraya həm təşkilat xərcləri, həm də 1 milyon dollar məbləğində mükafat fondu daxildir. Dövlət İdman Komitəsi Ponomaryovun hazırlığına 23 min dollar ayıracaqdır.
İclasda Təşkilat Komitəsinin sədri – Ukraynanın baş naziri Viktor Yanukoviç və Kalmıkiya Prezidenti, Dünya Şahmat Federasiyasının başçısı Kirsan İlyumjinov iştirak etmişlər. V.Yanukoviç demişdir: “Yarış MDB dövlət başçılarının Yaltada keçiriləcək zirvə görüşü ilə bir vaxta düşəcəkdir. Ona görə də biz qalan bu qısa vaxtda hər şey etməliyik ki, matç yüksək səviyyədə keçsin”.