SALYAN RAYONUNDA 5500 HEKTAR SAHƏDƏ TAXIL ƏKİLMİŞDİR
AZƏRTAC-ın müxbiri xəbər verir ki, Salyan rayonunda indiyədək gələn ilin məhsulu üçün 5500 hektar sahədə payızlıq taxıl əkilmişdir.
Qarşıdakı mövsümdə əvvəlkindən azı 2 min hektar çox, yəni 19 min hektarda taxıl yetişdirilməsi nəzərdə tutulur. Ölkə başçısının taxıl istehsalçılarının əməyini stimullaşdırmaq məqsədi ilə onlara subsidiyalar verilməsi ilə bağlı müvafiq Sərəncamı torpaq mülkiyyətçilərini xeyli həvəsləndirmişdir. Daha səriştəli sahibkarların fikrincə, Sərəncam növbəli əkin sisteminin tətbiqinə də əhəmiyyətli təsir göstərəcəkdir.
Rayonda hər gün taxıl səpininə 80-dən artq taxılsəpən aqreqat, 40-a yaxın malaçəkən traktor cəlb edilir. Gün ərzində 300-350 hektar sahəyə toxum səpilir. Toxum ehtiyatının əsasını "Nurlu" "Bərəkətli", "Qılçıqsız" və bir sıra digər məhsuldar taxıl növləri təşkil edir.
Qeyd edək ki. 2008-ci ildə rayonda zəmilərdən 55 min 094 ton məhsul yığılmışdır. Gələn il həmin rəqəmin 70 min tona çatdırılması nəzərdə tutulur.
Bölmənin digər xəbərləri
