ŞAMAXI MEŞƏLƏRİNDƏ BƏRPA İŞLƏRİ APARILIR
Meşələr təbiətin bizə bəxş etdiyi əvəzsiz nemətdir. Bu gün Şamaxı ərazisində 13min522 hektar meşə sahəsi vardır. Hazırda boş sahələrdə yeni meşəliklərin salınması, habelə, bərpa işlərinin aparılması xüsusi diqqət mərkəzindədir. Respublika Ekologiya və Təbii Sərvətlər Nazirliyi Şamaxı Meşə Mühafizəsi və Bərpası Müəssisəsinin direktoru Arif Şirinov AZƏRTAC-ın müxbirinə bildirmişdir ki, bu il ərazidə 100 hektar sahədə meşəsalma və bərpa işləri nəzərdə tutulmuşdur. Yaz aylarında 10 hektarda bu işlər görülmüş, qalan 90 hektarda isə əkin işləri payız-qış mövsümündə yerinə yetiriləcəkdir. Hazırda bütün qüvvələr bu istiqamətdə həyata keçirilən tədbirlərə səfərbər olunmuşdur. Qeyd edək ki, Bərdə və Ağcabədi meşə mühafizəsi və bərpası müəssisəsindən 90 minədək şitil gətirilmişdir. Bundan başqa, Ağsu meşəsinin Duruçay ərazisindəki tingliyində bu məqsədlə 70 min ədəd şitil yetişdirilmişdir. Bu şitillər əsasən Dədəgünəş, Ağsu meşəliklərində, eləcə də ayrı-ayrı ərazilərdə əkilir. Ting əkininə müəssisənin 50 nəfər işçisi, habelə 30 nəfər mövsümi fəhlə cəlb edilmişdir. Qısa müddətdə 30 hektar ərazidə əkin və bərpa işləri başa çatdırılmışdır. Qalan 40 hektarda isə artıq çalalar qazılmış, cavan tinglərin əkininə başlanmışdır. Bu işin ilin sonunadək başa çatdırılması üçün bütün imkanlardan istifadə olunur.
Bölmənin digər xəbərləri
