Sankt-Peterburqda daşınmaz əmlakın qeydiyyatı və kadastrı ilə bağlı görüş keçirilib
Bakı, 27 iyun, AZƏRTAC
İqtisadiyyat Nazirliyi yanında Əmlak Məsələləri Dövlət Xidmətinin nümayəndələri Rusiya Federasiyasının Sankt-Peterburq şəhərində keçirilən XXVII Sankt-Peterburq Beynəlxalq İqtisadi Forumunda iştirak edib.
AZƏRTAC Əmlak Məsələləri Dövlət Xidmətinə istinadla xəbər verir ki, Forumda “Məkan məlumatları - ərazilərin inkişafının əsasıdır” panelində çıxışlar olub və müzakirələr aparılıb.
Qeyd olunub ki, daşınmaz əmlakın tam və dəqiq reyestrinin aparılması məkan məlumatlarının infrastrukturunda əsas rol oynayır. Bu məlumatlar daşınmaz əmlakın yerləşməsi və ölçülərindən, torpaq sahələrinin göstəricilərindən, mülkiyyət hüququndan və digər informasiyalardan ibarətdir. Məlumatların vahid və dəqiq olması ölkənin sosial-iqtisadi inkişafı, investisiya imkanlarının genişləndirilməsi baxımından böyük əhəmiyyət kəsb edir.
Rusiya Federasiyasının Dövlət Qeydiyyatı, Kadastrı və Xəritəçəkmə üzrə Federal Xidmətində keçirilmiş görüşdə isə daşınmaz əmlakın qeydiyyat prosesinin optimallaşdırılması, rəqəmsallaşdırılması, avtomatlaşdırılması və süni intellektin tətbiq edilməsi sahəsində yeniliklər barədə iştirakçılara məlumat verilib.
Qeyd edilənlərlə bağlı qurumlararası əməkdaşlıq məsələləri müzakirə olunub.
Bölmənin digər xəbərləri
