Səbail rayonunda əhalinin tibbi müayinələrdən keçirilməsi vəziyyəti müzakirə olunmuşdur
Bakı, 2 aprel (AZƏRTAC). Prezident İlham Əliyevin tapşırığına uyğun olaraq fevralın 17-dən mayın 1-dək ölkəmizdə əhalinin tibbi müayinədən keçirilməsi tədbirləri Səbail rayonunda da yüksək səviyyədə təşkil olunmuşdur.
Bu mühüm aksiyanın keçirilməsi vəziyyətini müzakirə etmək üçün Səbail Rayon İcra Hakimiyyəti başçısının yanında Şuranın geniş yığıncağı keçirilmişdir.
Rayon icra hakimiyyətindən AZƏRTAC-a bildirmişlər ki, iclasda çıxış edən rayon icra hakimiyyətinin başçısı Asif Əsgərov Prezident İlham Əliyevin diqqət və qayğısının məntiqi nəticəsi olaraq ölkəmizdə iqtisadiyyatın inkişafının səhiyyə sahəsində də görülən işlərin daha böyük vüsətlə davam etdirilməsinə imkan yaratdığını diqqətə çatdırmışdır. Vurğulanmışdır ki, əhalinin sağlamlığı məsələlərini hər zaman diqqətdə saxlayan dövlət başçısının imzaladığı Dövlət Proqramlarına, sərəncam və tapşırıqlarına əsasən müxtəlif profilli yeni səhiyyə müəssisələrinin tikintisi, mövcud tibb ocaqlarının yüksək standartlara cavab verə biləcək səviyyədə təmir olunması, yenidən qurulması, bu müəssisələrin müasir tibb avadanlıqları ilə təchizatı məsələləri aparılır.
Bildirilmişdir ki, rayonda fəaliyyət göstərən 25 tibb müəssisəsinin böyük əksəriyyəti əsaslı təmir olunmuşdur. Təkcə son iki il ərzində Səbail rayonunda MTN-nin yeni hərbi hospitalı istifadəyə verilmiş, 1, 2, 15, 33 saylı şəhər poliklinikaları, 3 saylı vərəm əleyhinə dispanser, 3 saylı təcili tibbi yardım stansiyası əsaslı təmir olunmuş, yeni 19 saylı köməkçi təcili yardım stansiyası açılmışdır.
Qeyd edilmişdir ki, dövlət başçısının tapşırığı ilə əlaqədar rayon icra hakimiyyətində müşavirə keçirilmiş, əlaqədar qurumlara müvafiq tapşırıqlar verilmişdir.
Məlumat verilmişdir ki, fevral ayının 17-dən aprel ayının 1-dək rayon üzrə 42.084 nəfər müayinələrdən keçmişdir. Müayinələr zamanı bəzi şəxslərdə arterial təzyiq, şəkərli diabet, qan, ürək-damar, tənəffüs sistemi və oynaq xəstəlikləri aşkarlanmış xəstələr ambulator, stasionar müalicəyə cəlb olunmuş və dispanser qeydiyyata götürülmüş, onlara ixtisaslı həkimlər tərəfindən müalicə təyin olunmuşdur. Bu müddətdə 143 nəfər stasionar müalicəyə götürülmüş, 5649 nəfərə ambulator müalicə təyin edilmişdir. Görülən işlər rayon icra hakimiyyətində yaradılmış komissiya tərəfindən əlaqələndirilir.
Şura iclasında çıxış edən 1 saylı poliklinikanın baş həkimi Kübra Cabbarova, 33 saylı poliklinikanın baş həkimi Nazim İldırımzadə, 34 saylı poliklinikanın baş həkimi Vəfa Əliyeva, 2 saylı poliklinikanın baş həkim müavini Şahin Quliyev çalışdıqları tibb müəssisələrində əhalinin profilaktik müayinəsi, həmçinin nəzərdə tutulan tədbirlərlə bağlı məlumat vermişlər.
Bildirilmişdir ki, rayon ərazisində yerləşən bütün müəssisələrin, idarə və təşkilatların, orta və ali təhsil müəssisələrinin, digər təşkilatların işçilərinin, ərazidə məskunlaşmış məcburi köçkünlərin də tibbi müayinələrə qatılması üçün işlər həyata keçirilir. Bir sıra hallarda isə səhiyyə müəssisələrində təşkil olunmuş səyyar həkim briqadaları tərəfindən iş yerlərində müayinələrin keçirilməsi aparılır, həmçinin xəstə vətəndaşlar evlərində müayinə olunurlar.
Tədbirdə bir sıra təkliflər də səsləndirilmisdir.
Sonda bu mühüm aksiyanın uğurla başa çatdırılması üçün əlavə tədbirlərin həyata keçirilməsi ilə bağlı qarşıda duran vəzifələrdən danışılmış, təşkilat rəhbərlərinə tapşırıqlar verilmişdir.
Bölmənin digər xəbərləri
