Şəhid ailələri və qazilərin evlə təminatına sosial tərəfdaşlardan mühüm dəstək
Bakı, 16 avqust, AZƏRTAC
Prezident İlham Əliyevin çağırışına uyğun olaraq, ölkəmizdə özəl sektorun sosial məsuliyyət, həmrəylik prinsipinə əsaslanan fəaliyyəti son illərdə xeyli güclənib. Sosial məsələlərin həllində Əmək və Əhalinin Sosial Müdafiəsi Nazirliyi ilə sosial tərəfdaşlıq müstəvisində yaxından iştirak edən şirkətlərin sırası getdikcə genişlənir. Onların sırasında “Paşa Holdinq” və Kapital Bank” bu sahədə aparılan işlərə dəyərli töhfə verirlər.
Nazirliyin İctimaiyyətlə əlaqələr və kommunikasiya şöbəsindən AZƏRTAC-a verilən məlumata görə, 2019-2020-ci illərdə “Paşa Holdinq” tərəfindən ölkəmizin müxtəlif bölgələrində həssas əhali qruplarından olan şəxslərə məxsus 19 fərdi ev təmir etdirilib. Həmin müddətdə şirkət Bakının Zabrat qəsəbəsində 4, bölgələrdə 34 fərdi ev inşa etdirərək Milli Qəhrəman və şəhid ailələrinə, qazilərə, digər həssas qruplardan olan şəxslərə təqdim edib. Həmçinin paytaxtın Əhmədli qəsəbəsində həssas qruplardan olan 10 ailənin mənzillərlə təminatını həyata keçirib.
Bu il də “Paşa Holdinq”in sosial sahəyə dəstək işləri davam etdirilir. Bu il şirkət tərəfindən ölkəmizin bölgələrində şəhid ailələri və müharibə əlilləri, digər həssas qruplar üçün 30 fərdi evin inşa etdirilməsi və 15 ailənin mənzillərlə təmin olunması nəzərdə tutulub.
Özəl sektorun sosial məsuliyyət çərçivəsində həssas qruplara dəstəyinin ən uğurlu nümunələrindən biri də “Kapital Bank” tərəfindən şəhid ailələri və Qarabağ müharibəsi əlilləri üçün Şirvan şəhərində 68 mənzilli yaşayış binasının inşa etdirilməsidir. Bununla ölkəmizdə şəhid ailələri və müharibə əlilləri üçün məhz özəl sektor tərəfindən ilk dəfə olaraq çoxmənzilli yaşayış binası inşa etdirilmiş oldu.
2020-ci ilin iyulunda tikintisi yekunlaşan 4 mərtəbəli, 3 bloklu binada müasir tələblərə uyğun yaşayış şəraitinin yaradıldığı mənzillər (16-sı birotaqlı, 44-ü ikiotaqlı, qalanları üçotaqlı) həm Şirvan şəhərində, həm ətraf rayonlarda yaşayan müvafiq kateqoriyalardan olan vətəndaşların istifadəsinə təqdim edilib.
Beləliklə, son iki ildə - 2019-2020-ci illərdə “Paşa Holdinq” və “Kapital Bank”ın dəstəyi ilə həmin kateqoriyalardan olanlara 116 mənzil və fərdi ev verilib, 19 fərdi ev təmir etdirilib.
Bölmənin digər xəbərləri
