Şəhidlərimizin xatirəsi İndoneziyada anılıb
Pekin, 26 sentyabr, AZƏRTAC
27 Sentyabr - Anım Günü ilə əlaqədar İndoneziyanın paytaxtı Cakartadakı İstiqlal məscidində cümə namazı mərasimi keçirilib.
Azərbaycanın İndoneziyadakı səfirliyindən AZƏRTAC-a bildiriblər ki, məscidin imamı mərasimin Azərbaycanın azadlığı, ərazi bütövlüyü və suverenliyi uğrunda canını fəda etmiş şəhidlərin əziz xatirəsinə həsr olunduğunu, Azərbaycanın 30 ilə yaxın işğal altında olan torpaqlarının azad edilməsi ilə ədalətin bərqərar olduğunu deyib. Bildirib ki, Anım Günü vətən uğrunda canlarını fəda edənlərə görə hüznlə, şəhidlərin qələbəyə və sülhə aparan şücaətinə görə qürurla qeyd olunur.
Şəhidlərimizin ruhuna dualar oxunub.
Namazdan sonra çıxış edən səfir Ramil Rzayev Anım Gününün Azərbaycan xalqı üçün əhəmiyyətindən danışıb, şəhidlərin xatirəsinin müqəddəs məsciddə yad edilməsinin Azərbaycan və İndoneziya xalqları arasında möhkəm qardaşlıq əlaqələrinin bariz nümunəsi olduğunu bildirib. O, tədbirin təşkilində dəstəyə görə məscid rəhbərliyinə, dini işlər üzrə nazirə təşəkkür edib.
İndoneziyanın dini işlər üzrə nazir Nasruddin Umar çıxışında 27 sentyabr tarixinin səfirliyin Azərbaycanın suverenliyi və ərazi bütövlüyü uğrunda həlak olan şəhidlərin xatirəsinə ehsan verməsini təqdir edib.
Sonra səfirlik tərəfindən İstiqlal məscidində 1300-ə yaxın şəxsə ehsan payı verilib.
Məscidin girişində 27 Sentyabr - Anım Günü ilə əlaqədar stend yerləşdirilib. Bundan başqa, səfir R.Rzayev jurnalistlərə müsahibəsində Azərbaycanın torpaqlarının işğaldan azad edilməsi ilə başa çatan 44 günlük İkinci Qarabağ müharibəsindən, hərbçilərimizin qəhrəmanlığından danışıb, Azərbaycan xalqının şəhidlərin əziz xatirəsini daim yaşadacağını söyləyib.
Qeyd edək ki, İndoneziyanın müstəqilliyinin əbədiləşdirilməsi məqsədilə inşa edilən İstiqlal məscidi Cənub-şərqi Asiyada ən böyük məsciddir. Burada eyni vaxtda təxminən 200 min nəfər ibadət edə bilər.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
