“ŞƏKİ-İPƏK” SƏHMDAR CƏMİYYƏTİ MƏHSUL İSTEHSALINI ARTIRIR

29.04.2006 [13:55]
Çap et
A⁺ A^-

“Şəki-İpək” Açıq Səhmdar Cəmiyyətindən AZƏRTAC-ın müxbirinə bildirmişlər ki, 2006-cı ilin birinci rübündə müəssisədə məhsul istehsalının həcmi 738,4 min AZN olmuşdur ki, bu da 2005-ci ilin eyni dövrü ilə müqayisədə xeyli çoxdur. Həmin dövrdə məhsul satışının həcmi isə 402,5 min AZN təşkil etmişdir. Xatırladaq ki, 2005-ci ildə səhmdar cəmiyyətində bütün istehsal sahələri üzrə ümumi məhsul buraxılışının həcmi 2,5 milyon, məhsul satışının həcmi isə 660 min AZN olmuşdur.

Cari ilin yanvar-mart aylarında müəssisədə 444,3 min manat dəyərində 12,8 ton xam ipək, dəyəri 141,8 min manat olan 218,4 min poqonmetr təbii, süni və pambıq parça, 35 min manat dəyərində 1,4 ton burulmuş sap, 99,4 min manat dəyərində 25,6 min ədəd müxtəlif ölçülü kəlağayı istehsal olunmuş, habelə dəyəri 17,9 min manat olan 15,5 kvadratmetr təbii ipək xalça toxunmuşdur.

Hazırda rayonun bu iri sənaye müəssisəsində 1600 nəfərə yaxın işçi çalışır.