ŞƏKİ TAXILÇILARI MÖVSÜMƏ CİDDİ HAZIRLAŞIRLAR
Şəki, 15 mart (AZƏRTAC). Şəki rayonunun taxılçılıq təsərrüfatlarında yazın gəlişi ilə əlaqədar taxıl əkinlərinə aqrotexniki xidmət göstərilməsinə başlanılmışdır. 2009-cu ilin payızında təsərrüfatlarda cari ilin məhsulu üçün 72 min 223 hektar sahədə taxıl əkilmişdir. Əkin sahələrinin 55 min 881 hektarını buğda, 16 min 342 hektarını isə arpa sahələri təşkil edir.
İcra hakimiyyətinin aqrar məsələlər şöbəsindən bildirmişlər ki, indiyədək 13 min hektar sahəyə azot gübrəsi verilmişdir. Bu iş davam etdirilir. Bundan əlavə, sahələrdə xəstəliklərə və gəmiricilərə qarşı kimyəvi mübarizə tədbirləri aparılmışdır. Hazırda əkin sahələrinin suvarılması üçün hazırlıq işləri görülür, su kanalları təmizlənir.
Rayonun təsərrüfatlarında yaz-tarla işlərinə hazırlıq işləri də davam etdirilir. Bu il 8 min hektar sahədə yazlıq bitkilərin əkilib becərilməsi nəzərdə tutulur.
Bölmənin digər xəbərləri
