Şəmkir Debat Mərkəzi fəaliyyətə başlamışdır
Bakı, 12 noyabr (AZƏRTAC). “Vətəndaş Cəmiyyətində Debat” İctimai Birliyi (İB) tərəfindən Şəmkirdə yeni yaradılan Debat Mərkəzinin açılışı olmuşdur.
İctimai birlikdən AZƏRTAC-a bildirmişlər ki, açılış mərasimində Şəmkirdəki “Zəka” Gənclərin İntellektual İnkişafı və Yaradıcılıq Mərkəzinin direktoru Araz Paşayev yeni yaradılan Debat Mərkəzinin gələcək planlarından danışmışdır.
“Vətəndaş Cəmiyyətində Debat” İB-nin sədri Seymur Hüseynov isə demişdir: “Debatın regionlarımızda təbliğ olunması region gənclərinin maarifləndirilməsi baxımından əhəmiyyətlidir. Yeni yaradılan Şəmkir Debat Mərkəzinin gələcəkdə fəaliyyəti ilə seçiləcək bir mərkəz olacağına inanır və bu mərkəzə uğurlar arzu edirik”.
Bildirilmişdir ki, Şəmkir Debat Mərkəzinin əsas fəaliyyəti gənclərin təşəbbüslərinin dəstəklənməsi və gənclər üçün müxtəlif xidmətlərin göstərilməsi ilə cəmiyyətin maarifləndirilməsidir.
Qeyd edilmişdir ki, Şəmkir Debat Mərkəzi “Vətəndaş Cəmiyyətində Debat” İB-yə məxsus sayca 11-ci mərkəzdir. Hazırda Bakı, Sumqayıt, Qusar, İsmayıllı, Şəki, Gəncə, Ağdam, Biləsuvar, Sabirabad və Lənkəranda debat mərkəzləri fəaliyyət göstərir.
Bölmənin digər xəbərləri
