ŞƏMKİRDƏ GƏNCLƏR HƏQİQİ HƏRBİ XİDMƏTƏ HƏVƏSLƏ GEDİRLƏR
Şəmkirdə gənclərin həqiqi hərbi xidmətə növbəti yolasalma mərasimi əsl bayram əhval-ruhiyyəsi ilə həyata keçirilmişdir.
Mərasimdə çıxış edən rayon icra hakimiyyətinin nümayəndələri, valideynlər, əmək və müharibə veteranları gənclərə Vətənin keşiyində ayıq-sayıq dayanmağı, düşmən taptağı altında olan torpaqlarımızı azad etmək üçün hərbin sirlərinə mükəmməl yiyələnməyi tövsiyə etmişlər.
Çağırışçı gənclər Vətənə ləyaqətlə xidmət edəcəklərinə, torpaqlarımızın işğaldan azad olunması üçün Ali baş komandan İlham Əliyevin döyüş əmrinə hər zaman hazır olacaqlarına söz vermişlər.
Sonra gənclər üçrəngli bayrağımızın altında keçərək musiqi sədaları altında hərbi hissələrə yola düşmüşlər.
Rayonun hərbi komissarı, polkovnik Həsrət İsmayılov AZƏRTAC-ın müxbirinə demişdir ki, bu gün çağırış yaşlı gənclər özləri könüllü olaraq komissarlığa müraciət edərək Vətən qarşısında borcunu yerinə yetirmək arzusunu bildirirlər. Həmişə olduğu kimi, növbəti çağırış kampaniyası da mütəşəkkilliklə, gənclərin fəallığı ilə həyata keçirilir.
