MƏDƏNİYYƏT
“SƏNƏT TÖHFƏSİ” SƏRGİSİ AÇILMIŞDIR
R.Mustafayev adına Azərbaycan Dövlət İncəsənət Muzeyində Çin Xalq Respublikasının yaranmasının 53-cü ildönümü münasibətilə “Sənət töhfəsi” adlı sərgi açılmışdır.
Azərbaycan Mədəniyyət Nazirliyi və ÇXR-nın ölkəmizdəki səfirliyi tərəfindən təşkil olunmuş sərgidə müasir Çin rəssamlarının ənənəvi üslubda, müxtəlif janr və mövzularda yaratdığı 60 rəsm əsəri - “Şam ağacı üzərində quş”, “Şərqi Çində bahar”, “Yağışdan sonra”, “Payız” və s. nümayiş etdirilir. Sərginin ekspozisiyasını Azərbaycan Dövlət İncəsənət Muzeyinin kolleksiyasına mənsub olan Çin dekorativ -tətbiqi sənət nümunələri tamamlayır.
Milli Məclisin deputatlarının, xarici ölkələrin səfirlərinin, elm, mədəniyyət və incəsənət xadimlərinin iştirak etdiyi tədbiri muzeyin direktoru, xalq rəssamı İbrahim Zeynalov açdı.
Mədəniyyət nazirinin müavini Sevda Məmmədəliyeva çıxış edərək ölkələrimiz arasında əlaqələrin möhkəmlənməsində Azərbaycan Prezidenti Heydər Əliyevin xidmətlərini xüsusi vurğuladı. Sonra o, Çin incəsənətinin özünəməxsus cəhətlərindən söhbət açdı.
ÇXR-nın Bakıdakı fövqəladə və səlahiyyətli səfiri Çjan Siyun Azərbaycan ilə Çinin mehriban dostluq münasibətlərindən danışaraq onun əhəmiyyətini diqqətə çatdırdı.
Rəssamlar İttifaqının sədri Fərhad Xəlilov, akademik Bəkir Nəbiyev və başqaları Çin rəssamlarına yeni yaradıcılıq uğurları arzuladılar.
Sonra tədbir iştirakçıları sərgi ilə tanış oldular.