SƏRHƏDDƏKİ PROBLEMLƏR RUSİYA İLƏ AZƏRBAYCAN ARASINDA TİCARƏT DÖVRİYYƏSİNƏ CİDDİ ZƏRƏR VURUR
Bu barədə məlumatı Milli Məclis sədrinin birinci müavini Arif Rəhimzadə Azərbaycan Respublikası Milli Məclisi və Rusiya Federasiyası Federal Məclisinin Parlamentlərarası Komissiyasının oktyabrın 21-də Bakıda keçirilən 4-cü iclasında vermişdir.
Komissiyanın həmsədri A.Rəhimzadə AZƏRTAC-ın müxbirinə demişdir ki, hazırda Azərbaycanda Rusiyanın təqribən 350 şirkəti fəaliyyət göstərir. Onların 82-si 100 faizli Rusiya kapitalı ilə işləyir. Azərbaycanla Rusiya arasında 100-dən çox müqavilə imzalanmışdır ki, bunların da 70-i dövlətlərarası və hökumətlərarası müqavilələrdir. Azərbaycan RF-nın 68 subyekti ilə əməkdaşlıq edir. Amma son günlər Rusiya hökumətinin Azərbaycanla sərhədə məhdudiyyətlər qoyması bu sahədə ciddi problemlər yaratmış, ticarət dövriyyəsinin həcmi kəskin surətdə aşağı düşmüşdür.
İclasda iştirak edən komissiyanın digər həmsədri, Rusiya Federasiyası Federasiya Şurasının MDB məsələləri üzrə Komitəsi sədrinin birinci müavini Konstantin Markelov demişdir ki, Rusiya tərəfi ölkələrimiz arasında ticarət dövriyyəsi həcminin daha da artırılmasını, təxminən 1 milyard dollara çatdırılmasını istəyir. Problemlər var və biz bunun həllinə çalışırıq. Sərhədlərin bağlanması müvəqqəti xarakter daşıyır və Rusiya-Azərbaycan sərhədində yaranmış problem yaxın günlərdə öz həllini tapacaqdır.
Bölmənin digər xəbərləri
