Şərur şəhərindəki Fizika-Riyaziyyat Təmayüllü Lisey böyük uğurlara imza atır
Şərur, 25 aprel, AZƏRTAC
Muxtar respublikanın sürətli sosial-iqtisadi inkişafı, yeni sənaye və xidmət sahələrinin yaradılması, həmin sahələrdə müasir informasiya texnologiyalarının tətbiqi, xüsusən dəqiq elmlər sahəsində tədrisin səviyyəsinin yüksəldilməsini tələb edir. Bununla əlaqədar muxtar respublikada dəqiq elmlər sahəsi üzrə kadrların hazırlanması diqqətdə saxlanılır. Naxçıvan Muxtar Respublikası Ali Məclisi Sədrinin 2015-ci il 14 aprel tarixli Sərəncamı ilə Şərur şəhərində Fizika-Riyaziyyat Təmayüllü Liseyin yaradılması bunun daha bir nümunəsidir. Lisey 2016-cı il sentyabrın 15-də - Bilik Günündə istifadəyə verilib. Məktəbin kollektivi ilə görüşündə Ali Məclisin Sədri deyib: “Vətənə, xalqa xidmətin ən yaxşı yolu mükəmməl təhsil almaqdır. Hər bir gənc bilməlidir ki, o yaxşı təhsil almaqla, ilk növbədə, ölkəmizin inkişafına öz töhfəsini vermiş olur”.
Ən müasir tədris şəraiti
Müasir tədris şəraiti yaradılan liseyə muxtar respublikanın ayrı-ayrı rayonlarından olan istedadlı uşaqlar müsabiqə yolu ilə seçilirlər. Onlar yataqxana və yüksəkkeyfiyyətli yeməklə təmin edilirlər. Şagirdlərə burada əsas fənlərdən dərinləşdirilmiş proqramla dərslər keçilir. Liseydə uşaqların yüksək hazırlıq səviyyəsini təmin etmək üçün müasir maddi-texniki baza mövcuddur. Burada interaktiv dərslər yüksək texnologiyaların tətbiqi ilə həyata keçirilir. Dərslərində xüsusi fərqlənən və istedadı ilə seçilən məktəblilər muxtar respublika və ölkə səviyyəli olimpiadalara hazırlaşdırılırlar.
Beşmərtəbəli lisey tədris və yataqxana korpuslarından ibarətdir. 380 yerlik tədris korpusunun 5-i elektron lövhəli olmaqla, 19 sinif otağı, kimya, biologiya və fizika laboratoriyaları, hərbi kabinə, şahmat, iki kompüter, müəllimlər otağı, akt zalı, kitabxana, arxiv və bufeti var. Liseydə internetlə bağlantısı olan 42 kompüter quraşdırılıb, kitabxanada 4 min 184-ü dərslik, 2 min 65-i bədii ədəbiyyat olmaqla, 6 min 249 kitab, 2 mindən artıq elektron dərslik mövcuddur. Şagirdlərə elektron lövhələr vasitəsilə muxtar respublikanın müxtəlif muzeylərindən birbaşa yayımlanan interaktiv dərsləri izləmək imkanı yaradılıb.
Təhsil müəssisəsinin 273 yerlik yataqxanasında 5 və 3 yerlik 87 yataq otağı, növbətçi, nəzarətçi və istirahət, həkim və müayinə otaqları, idman zalı, yeməkxana, mətbəx, ərzaq anbarları, bərbərxana, təsərrüfat otağı və camaşırxana var. Otaqlar zəruri mebel avadanlıqları ilə təchiz olunub. Bütün bunlar isə şagirdlərin sağlam böyümələrinə, hərtərəfli inkişafına şərait yaradan amillərdir.
Məzunların uğurlu nəticələri
Liseydə təhsil alan 229 şagirdin təlim-tərbiyəsi ilə 33 müəllim məşğul olur. Ötən tədris ilində liseyin ilk məzunları buraxılıb. Nəticələr də ürəkaçan olub. Belə ki, məzunların hamısı respublikanın müxtəlif ali məktəblərinə daxil olaraq tələbə adını qazanıb. 9 məzunun göstəricisi isə 500-700 bal intervalında olub. Məktəbi qızıl medalla bitirən Real Sərxanbəyli isə 665 balla Bakı Mühəndislik Universitetinin tələbəsi adını qazanıb.
Bu gün davamlı olaraq muxtar respublikada təhsil sahəsində islahatlar həyata keçirilməkdədir. Bütün bunlar bir daha əmin olmağa əsas verir ki, təhsilimiz özünün zəngin mütərəqqi ənənələrinə, milli-mənəvi və ümumbəşəri dəyərlərə, beynəlxalq təcrübəyə əsaslanaraq daha da inkişaf edəcəkdir. Qazanılan bütün nailiyyətlərin əsasında muxtar respublika rəhbərinin təhsilə göstərdiyi qayğı dayanır. İnanırıq ki, ilk iki buraxılışın sevincini yaşayan Şərur Şəhər Fizika-Riyaziyyat Təmayüllü Liseyin pedaqoji kollektivi qazanılan uğurlarla kifayətlənməyəcək, bu tədris ilində də yüksək nəticələrin əldə edilməsinə çalışacaq, gənc nəslin milli, ümumbəşəri ideyalar ruhunda tərbiyə olunması üçün yaradılmış imkanlardan maksimum istifadə edərək tədrisin kəmiyyət və keyfiyyətinin daha da yüksəldilməsinə nail olacaqdır. Dövlət qayğısı ilə əhatə olunan bu təhsil müəssisəsi gələcək illərdə böyük uğurlara imza atacaqdır.
AZƏRTAC-ın Naxçıvan bürosu
Bölmənin digər xəbərləri
