ŞEYXÜLİSLAM JURNALİSTLƏRƏ BEYNƏLXALQ KONFRANSDA İŞTİRAKI BARƏDƏ MƏLUMAT VERMİŞDİR
AZƏRTAC xəbər verir ki, Qafqaz Müsəlmanları İdarəsinin sədri, şeyxülislam Allahşükür Paşazadə “Allaha və qonşuya məhəbbət sözdə və əməldə: bu, müsəlmanlara və xristianlara nə verir” mövzusunda beynəlxalq konfransda iştirak etmək üçün iyulun 28-dən avqustun 2-dək ABŞ-ın Nyu-Heyven şəhərində səfərdə olmuşdur.
Şeyxülislam avqustun 7-də keçirdiyi mətbuat konfransında həmin tədbirdə iştirakı barədə məlumat vermişdir.
İordaniyanın “Al əl-beyt” İslam Fikir Akademiyası və ABŞ-ın nüfuzlu Yel Universitetinin birgə təşkil etdikləri konfransda A.Paşazadə də çıxış etmişdir. O, Azərbaycanda dini dözümlülük ənənəsinin, tolerantlığın qədim tarixə malik olduğunu, bunun dövlət siyasəti kimi davam etdirilməsində ulu öndər Heydər Əliyevin xidmətlərini vurğulamışdır. Azərbaycanlılarla birgə yaşayışın mümkünsüzlüyü barədə erməni millətçilərinin yaydıqları məlumatların məkrli təbliğat xarakteri daşıdığını bildirən şeyxülislam çıxışında Dağlıq Qarabağ münaqişəsinin məhz ermənilərin qonşuya məhəbbət hissindən uzaq olmaları, daim monoetnikliyə və separatçılığa meyil etmələri üzündən yarandığını konkret faktlarla göstərmişdir. O, Ermənistandakı məscidlərin, eləcə də ermənilərin işğal etdikləri Azərbaycan ərazilərində dini, tarixi, mədəniyyət abidələrinin vəhşicəsinə dağıdılması barədə də məlumat vermişdir.
Dinlərarası, mədəniyyətlərarası dialoqun inkişaf etdirilməsinin vacibliyini vurğulayan A.Paşazadə gələn ilin oktyabrında Azərbaycanda dünyanın dini liderlərinin zirvə görüşünün keçirilməsi ilə bağlı ilkin razılığın əldə olunduğunu bildirmişdir.
Şeyxülislam ABŞ-a səfəri çərçivəsində Nyu-Yorkda Azərbaycanın BMT yanında daimi nümayəndəliyində də görüşlər keçirmişdir.
######
