Respublikamızda rəsmi səfərdə olan Sloveniyanın xarici işlər naziri Dimitriy Rupel və onun başçılıq etdiyi nümayəndə heyətinin üzvləri aprelin 20-də Şəhidlər xiyabanını ziyarət etmişlər.

Cənab D.Rupel Azərbaycanın azadlığı, müstəqilliyi və ərazi bütövlüyü uğrunda həlak olmuş qəhrəmanların xatirəsini ehtiramla yad etdi, “Əbədi məşəl” abidəsinin önünə əklil qoydu.

Sonra nazir Şəhidlər xiyabanının fəxri qonaqlar kitabına ürək sözlərini yazdı.

NAZİRLƏR KABİNETİ MƏTBUAT MƏRKƏZİNİN MƏLUMATI

Aprelin 20-də Azərbaycan Respublikasının baş naziri Artur Rasizadə Sloveniyanın xarici işlər naziri Dimitriy Rupeli qəbul etmişdir.

Qonağı salamlayan baş nazir Artur Rasizadə ölkələrimiz arasında yaranmaqda olan münasibətlərin inkişaf etdirilməsinə tərəfdar olduğunu vurğuladı. Baş nazir səmərəli iqtisadi əməkdaşlıq qurulması məqsədi ilə, hər iki tərəfi təmsil edən bir qurum yaradılmasının vacib olduğunu nəzərə çarpdırdı.

Ermənistan-Azərbaycan, Dağlıq Qarabağ münaqişəsinə toxunan baş nazir Artur Rasizadə Ermənistanın ölkəmizə hərbi təcavüzünün ağır nəticələri barədə qonağa ətraflı söhbət açdı.

Səmimi qəbula görə Azərbaycanın baş nazirinə təşəkkür edən Dimitriy Rupel bu səfərinin regionla tanışlıq məqsədi daşıdığını söylədi. O, Azərbaycanla sıx və hərtərəfli əlaqələr yaradılmasına ölkəsinin böyük maraq göstərdiyini bildirirək, xarici siyasət idarəsinin rəhbəri kimi, Azərbaycanla Sloveniya arasında əməkdaşlığın inkişaf etdirilməsi üçün qüvvəsini əsirgəməyəcəyini vurğuladı.

Görüş zamanı qarşılıqlı maraq doğuran bir sıra digər məsələlər ətrafında da fikir mübadiləsi aparıldı.

Qəbulda Sloveniyanın Azərbaycandakı səfiri Andre Qrosselli iştirak edirdi.

MİLLİ MƏCLİSDƏ QƏBUL

Həmin gün Milli Məclis sədrinin birinci müavini Arif Rəhimzadə Sloveniyanın xarici işlər naziri Dimitriy Rupeli və onu müşayiət edən şəxsləri qəbul etmişdir.

Arif Rəhimzadə qonaqları səmimiyyətlə salamlayaraq, ölkəmizdə parlamentarizmin tarixinin Şərqdə ilk demokratik respublikanın - Azərbaycan Xalq Cümhuriyyətinin yarandığı dövrdən başlandığı barədə məlumat verdi. O dedi ki, suveren dövlətimizin parlamentarizm ənənələrini 70 ildən artıq bir dövrdən sonra bərpa etmək mümkün olmuşdur. Lakin ölkənin qanunvericilik orqanının fəaliyyətində yeni mərhələ Azərbaycan Prezidenti Heydər Əliyevin hakimiyyətə qayıdışından sonra başlanmışdır. Parlamentdə çəkişmələrə və qarşıdurmalara məhz onun müdrik siyasəti sayəsində son qoyulmuşdur.

Sonra Milli Məclis sədrinin birinci müavini ölkədə aparılan islahatlardan danışdı və onların qanunvericilik bazasının yaradılmasında parlamentin böyük rol oynadığını vurğuladı. O, Azərbaycanda həyata keçirilən iri beynəlxalq layihələrdən də danışdı.

Arif Rəhimzadə Ermənistanın ölkəmizə təcavüzünün faciəli nəticələrinə də toxunaraq, dedi ki, bu təcavüz nəticəsində təkcə Dağlıq Qarabağ ərazisi deyil, ətrafdakı yeddi rayon da işğal olunmuşdur. O, qonaqlara bildirdi ki, Milli Məclis ötən iclasında Azərbaycanın mədəni sərvətlərinin erməni işğalçıları tərəfindən dağıdılması və mənimsənilməsi ilə əlaqədar Bəyanat qəbul etmişdir. Həmin sənəd beynəlxalq təşkilatları və bütün ölkələrin parlamentlərini erməni millətçilərinin xalqımızın mədəni dəyərlərinə qarşı təcavüzünün dayandırılmasına kömək göstərməyə çağırır.

Sloveiyanın xarici işlər naziri Dimitriy Rupel Azərbaycan parlamentinə gəlməyindən məmnunluq duyduğunu bildirərək dedi ki, onun səfərindən başlıca məqsəd Azərbaycanın xarici siyasət fəaliyyəti ilə məşğul olan bütün təsisatları ilə sıx əlaqə yaratmaqdır. O vurğuladı ki, Sloveniya yaxın keçmişdə sabiq Yuqoslaviyanın tərkibindəki sosialist ölkələrindən biri olduğuna görə, onlar da keçid dövrünün problemiləri ilə qarşılaşmışlar.

Dimitriy Rupel Sloveniyanın dövlət hakimiyyəti strukturu və ölkə parlamentinin fəaliyyətinin əsas istiqamətləri barədə ətraflı məlumat verdi.

Qəbulda Sloveniyanın Azərbaycandakı səfiri Andre Qrosselli iştirak edirdi.

XARİCİ İŞLƏR NAZİRLİYİNDƏ QƏBUL

Aprelin 20-də Azərbaycanın xarici işlər naziri Vilayət Quliyev ölkəmizdə səfərdə olan Sloveniya xarici siyasət idarəsinin başçısı Dimitriy Rupeli qəbul etmişdir.

Vilayət Quliyev qonaqları salamlayaraq dedi ki, Sloveniya xarici işlər nazirinin regiona səfəri buradakı vəziyyət haqqında təsəvvür yaradacaq və Azərbaycanla Sloveniya arasında münasibətlərin inkişafına təkan verəcəkdir. Ölkələrimiz artıq bir çox beynəlxalq təşkilatlarda, o cümlədən Avropa Şurasında və NATO-nun “Sülh naminə tərəfdaşlıq” proqramında səmərəli əməkdaşlıq edirlər.

Ölkəmizin xarici siyasət idarəsinin başçısı Ermənistan-Azərbaycan, Dağlıq Qarabağ münaqişəsinin tarixi və mahiyyəti, Azərbaycan torpaqlarının Ermənistan silahlı birləşmələri tərəfindən işğal edilməsi barədə məlumat verdi.

Cənab Dimitriy Rupel bildirdi ki, onun ölkəsi Azərbaycanla əməkdaşlıq yaradılmasına və inkişaf etdirilməsinə maraq göstərir. O dedi ki, Azərbaycanda sürətlə gedən demokratik dəyişiklikləri görməyə şaddır. Nazir bunu da əlavə etdi ki, Qarabağ probleminin həlli regionda sabitliyin bərqərar olmasına və inkişafına imkan verəcəkdir.

Sonra xarici siyasət idarələrinin başçıları əməkdaşlıq haqqında protokol imzaladılar.