Stokholm birjasında səhmlərin qiyməti düşür
Stokholm, 3 fevral, Nərgiz Cəfərli, AZƏRTAC
Stokholm Fond Birjası ABŞ Prezidenti Donald Trampın tətbiq etdiyi yeni tariflər təhlükəsi səbəbindən ticarətə kütləvi enişlə başlayıb.
AZƏRTAC xəbər verir ki, OMXS indeksi 2,5 faiz ucuzlaşıb və OMXS30 siyahısına daxil olan şirkətlərin əksəriyyəti mənfi dinamika nümayiş etdirir. Ən böyük itkilər səhmləri 4,5 faiz ucuzlaşan İsveçin tikinti qrupu SBB, eləcə də 4 faiz dəyər itirən kondisioner avadanlığı istehsalçısı “Nibe” tərəfindən qeydə alınıb.
Sabit biznesi olan bəzi şirkətlər qeyri-müəyyən vaxtlarda daha yaxşı işləyirlər. Belə ki, İsveçin transmilli telekommunikasiya şirkəti “Telia”nın səhmləri 0,4 faiz bahalaşıb, “Tele2” isə cəmi 0,3 faiz dəyər itirib.
İsveçin ən böyük şirkətlərindən biri olan “Volvo Cars”ın səhmləri kəskin ucuzlaşıb (5,6 faiz).
Bazar dəyişkənliyi fonunda ABŞ dolları əhəmiyyətli dərəcədə möhkəmlənərək 11,23 İsveç kronuna çatıb.
Bölmənin digər xəbərləri
