ADEX Azərbaycanın müdafiə sənayesində əldə etdiyi imkanların nümayişi üçün mühüm platformadır ŞƏRH
Bakı, 2 oktyabr, AZƏRTAC
Azərbaycanın müstəqilliyini bərpa etdiyi ilk illərdə ölkənin qarşılaşdığı mürəkkəb hərbi-siyasi vəziyyət nizami ordunun və güclü müdafiə sisteminin yaradılmasını zəruri edirdi. Sonrakı dövrdə ordu quruculuğunun, hərbi kadr hazırlığının və müdafiə sənayesinin paralel şəkildə inkişaf etdirilməsi Azərbaycanın müdafiə qabiliyyətinin möhkəmləndirilməsinə imkan verdi. Bu gün ADEX sərgisi həmin inkişafın nəticələrini nümayiş etdirməklə yanaşı, müasir hərbi texnologiyaların öyrənilməsi və beynəlxalq əməkdaşlığın genişləndirilməsi baxımından mühüm platformaya çevrilib.
Bu fikirləri politoloq Tofiq Abbasov AZƏRTAC-a açıqlamasında deyib.
“Özünə arxayın olan ölkə ordu quruculuğunu, müdafiə sisteminin formalaşdırılmasını və hərbi sənaye kompleksinin inkişafını həmahəng şəkildə aparmalıdır. Azərbaycanda bu işlər paralel şəkildə həyata keçirildi. Bu prosesdə xarici tərəfdaşlarla əməkdaşlıq, xüsusilə Türkiyənin təcrübəsindən istifadə, hərbi kadrların hazırlanması, həmçinin yerli mühəndis, konstruktor və digər mütəxəssislərin yetişdirilməsi mühüm rol oynayıb. Hazırda Azərbaycanın formalaşmış hərbi sənaye kompleksi müxtəlif təyinatlı məhsullar istehsal edir və onların beynəlxalq bazarlara çıxarılması ölkənin müdafiə sənayesinin potensialını göstərir. 44 günlük Vətən müharibəsi və 2023-cü ilin sentyabrında həyata keçirilmiş antiterror tədbirləri Azərbaycanın hərbi imkanlarının yeni keyfiyyət mərhələsinə keçdiyini nümayiş etdirib. Müasir texnologiyalardan istifadə, yeni taktiki yanaşmalar və döyüş təcrübəsi Azərbaycanın hərbi potensialının beynəlxalq səviyyədə diqqət çəkməsinə səbəb olub. Biz XXI əsrin müharibəsinin tələblərinə uyğun yeni texnoloji yanaşmaları mənimsəmişik. Bu gün əsas məsələ dünyada gedən prosesləri izləməklə yanaşı, yeni tendensiyaları özümüzün yaratmağımızdır”, – deyə Tofiq Abbasov bildirib.
Politoloq əlavə edib ki, müasir dövrdə müdafiə sənayesinin inkişafı yalnız silah istehsalı ilə məhdudlaşmamalıdır. Dövlət qurumları, hərbi strukturlar, elmi-tədqiqat müəssisələri və müdafiə sənayesi arasında əlaqələrin gücləndirilməsi, tələbat və təkliflərin öyrənilməsi, mütəxəssislərin rəylərinin nəzərə alınması yeni ideyaların və texnoloji həllərin meydana çıxmasına şərait yaradır.
“Biz bir tərəfdən özümüz silah-sursat istehsal edir, digər tərəfdən isə xarici təcrübəni öyrənərək istehsal proseslərində müasir standartlardan geri qalmamağa çalışırıq. Zaman dəyişdikcə standartlar da dəyişir və müdafiə sənayesi daim yenilənməlidir. Azərbaycanın müdafiə siyasətinin əsas məqsədi müharibə aparmaq deyil, ölkənin təhlükəsizliyini və müdafiə qabiliyyətini təmin etməkdir. Güclü ordu, müasir silahlanma və yüksək döyüş qabiliyyəti mümkün risk və təhdidlər qarşısında ölkənin özünü müdafiə etmək imkanlarını artırır. Azərbaycan beynəlxalq müstəvidə özünü müharibə tərəfdarı kimi deyil, sülh tərəfdarı kimi tanıdıb. Güclü müdafiə imkanlarının formalaşdırılması da məhz ölkənin təhlükəsizliyinin təmin olunmasına və sülhün qorunmasına xidmət edir”, – deyə Tofiq Abbasov fikrini tamamlayıb.
Müxbir - Səbinə Əlizadə
Bölmənin digər xəbərləri
