SUMQAYIT LİFTLƏRİ ŞƏHƏR SAKİNLƏRİNƏ YAXŞI XİDMƏT GÖSTƏRİR
Sumqayıtın lift təsərrüfatı çoxmərtəbəli binaların sakinlərinə yaxşı xidmət göstərir. Bu barədə AZƏRTAC-ın müxbirinə şəhər icra hakimiyyətindən məlumat vermişlər. Son beş ildə istifadəyə yararsız bütün liftlər təmir olunmuş, yeniləri quraşdırılmışdır. Beləliklə, çoxmərtəbəli binaların sakinlərinin haqlı narazılıqlarına son qoyulmuşdur.
“Liftservis” müəssisəsi yaşayış binalarında 553, səhiyyə müəssisələrində isə 14 lifti təmir etmişdir. Uzun illər işləməyən 5 lift ötən il bərpa edilərək istifadəyə verilmişdir.
“Qafqaz lift-servis” Səhmdar Cəmiyyəti 2007-ci ildə Sumqayıtın yaşayış massivlərində, o cümlədən 47-ci məhəllədə 20, 12-ci mikrorayonda 12 yeni və müasir lift quraşdırmışdır. Bundan əlavə, 45-ci məhəllədə qəza vəziyyətində olan 5 lift yeniləri ilə əvəzlənmişdir. İcra hakimiyyətindən bildirmişlər ki, şəhərin lift təsərrüfatının vəziyyəti ciddi nəzarət altındadır.
