SUMQAYIT POLİSİNİN FƏALİYYƏTİNİN YÜKSƏK GÖSTƏRİCİLƏRİ
Əhalidən narkotik və psixotrop maddələrin götürülməsi sahəsində də ciddi iş görülmüşdür. Əgər ötən ilin müvafiq dövründə 21 cinayət işi açılmışdısa və 1 kiloqram 7 qram narkotik maddə götürülmüşdüsə, hesabat dövründə 26 cinayət işi qaldırılmış və 1 kiloqram 300 qram narkotik maddə, o cümlədən 775,58 qram marixuana, 521,97 qram tiryək götürülmüşdür. Həm də bu zaman polisin fəaliyyəti, əsasən, narkotik maddələrin mənbələrinin və gətirilmə kanallarının aşkara çıxarılmasına və ifşa olunmasına yönəldilmişdir. Yol hərəkəti qaydaları pozulduğuna görə şəhər yol polisinin xətti ilə avtonəqliyyat vasitələrinin sürücüləri barəsində 7289 protokol tərtib edilmiş və bunun nəticəsində dövlət büdcəsinə 163 milyon manat köçürülmüşdür. DİN kollegiyası qərarının icrası üçün vətəndaşlara şəxsiyyət vəsiqələri verilməsi işi gücləndirilmişdir. Əgər əvvəllər hər ay vətəndaşlara 1500-2000 vəsiqə verilirdisə, indi bu rəqəm 5000-ə çatdırılmışdır. S.Səfərov məmnunluqla qeyd etdi ki, 18 əməkdaşın vəzifəsi və rütbəsi yüksəldilmişdir. Bununla yanaşı, o, şəxsi heyətin fəaliyyəti ilə əlaqədar narahatlıq doğuran bəzi məsələlər üzərində də dayandı. Məruzəçi daxili işlər orqanlarının əməkdaşlarına daimi qayğı və diqqətə görə, polis işçilərinin əmək haqqının və vəzifə maaşlarının bu yaxınlarda 50 faiz qaldırıldığına görə Azərbaycan Prezidenti, Ali Baş Komandan Heydər Əliyevə xüsusi minnətdarlığını bildirdi. Bölmələrin, xidmətlərin, habelə hüquq-mühafizə orqanlarının rəhbərləri müşavirədə çıxış edərək, cinayətkarlığa qarşı mübarizə ilə bağlı problemlər barəsində öz fikir və mülahizələrini söylədilər. Sumqayıt İcra Hakimiyyətinin başçısı Vaqif Əliyev şəhərdə vəziyyətin sabit saxlanmasında, hüquq qaydasının və vətəndaşların təhlükəsizliyinin təmin edilməsində polisin müsbət rolundan danışdı. O, qeyd etdi ki, Azərbaycan Prezidenti Heydər Əliyev hüquqi, demokratik, dünyəvi dövlət quruculuğunun möhkəm təməlini qoymuşdur, elə bir dövlətin ki, burada polis əməkdaşlarına hər cür şərait yaradılmış, onların maddi-texniki bazası möhkəmləndirilmiş, peşəkar kadrların sırada saxlanması, səviyyəsinin yüksəldilməsi sahəsində iş görülmüşdür. Natiq son 10 ildə Azərbaycan polisinin şanlı yol keçdiyini və dövlətçiliyin qorunmasının və möhkəmlənməsinin keşiyində layiqincə durduğunu vurğulayaraq dedi ki, son üç ayda Sumqayıtda həyata keçirilmiş dəyişikliklərdə, habelə onun abadlaşdırılması sahəsində görülən genişmiqyaslı işlərdə Sumqayıt polisinin xidməti böyükdür. Sonda respublikanın daxili işlər naziri, general-polkovnik Ramil Usubov çıxış etdi. O, nəzərə çarpdırdı ki, Azərbaycan Prezidenti Heydər Əliyevin göstərişini yerinə yetirərək, Sumqayıtda tez-tez olmağı özünə borc bilir. Nazir şəhər Polis İdarəsinin yüksək nəticələrə nail olduğunu qeyd etdi. Onun fəaliyyətinin yüksək göstəriciləri idarənin rəhbərliyinin düzgün peşə, kadr, təşkilat siyasəti apardığına sübutdur. Başlıcası isə, onlar dövlətçiliyin mənafelərini etibarlı qoruyur, layiqincə xidmət edir, şəhərdə sabitliyin təminatçılarıdır. Bununla belə, nazir oktyabrın 15-dək – prezident seçkiləri gününədək 18 yaşı tamam olacaq vətəndaşlara şəxsiyyət vəsiqələrinin verilməsi dinamikasından narahatlığını bildirdi. Nazir həmin xidmətin rəhbəri Bəxtiyar Aslanova xəbərdarlıq edərək bildirdi ki, o, buna görə ciddi məsuliyyət daşıyır. R.Usubov ümidvar olduğunu söylədi ki, Sumqayıt polisi Azərbaycan polisinə daim qayğı göstərən ölkə Prezidenti, Ali Baş Komandan Heydər Əliyevin tələb və göstərişlərini əsas tutaraq, öz dövlətinə və xalqına bundan sonra da şərəflə xidmət edəcəkdir.
Bölmənin digər xəbərləri
