SİYASƏT
Sumqayıt quruculuğuna görə Ulu Öndərə, müasir inkişafına görə isə Prezident İlham Əliyevə borcludur – Deputat
![Sumqayıt quruculuğuna görə Ulu Öndərə, müasir inkişafına görə isə Prezident İlham Əliyevə borcludur – Deputat](/files/2023/3/1200x630/16983164891040226360_1200x630.jpg)
Sumqayıt, 26 oktyabr, AZƏRTAC
Prezident İlham Əliyevin rəhbərliyi ilə bu gün ölkəmizin regionları gündən-günə inkişaf edir və abadlaşır. Dövlətimizin başçısının çoxşaxəli fəaliyyətinin istiqamətlərindən biri olan regionların sosial-iqtisadi inkişafı ilə bağlı imzaladığı Dövlət proqramları 2004-cü ildən uğurla həyata keçirilir. Son illərdə reallaşdırılmış üç Dövlət Proqramı nəticəsində regionlarda əhəmiyyətli infrastruktur layihələr icra edilib, geniş abadlıq-quruculuq işləri görülüb. Hazırda icrası uğurla davam edən “Azərbaycan Respublikası regionlarının 2019-2023-cü illərdə sosial-iqtisadi inkişafı Dövlət Proqramı”nda iqtisadi sahə ilə yanaşı, sosial sahənin də tərəqqisinə xüsusi önəm verilib.
Bu sözləri AZƏRTAC-a açıqlamasında Milli Məclisin deputatı Emin Hacıyev söyləyib.
O, Prezident İlham Əliyevin Cənubi Qafqazın ikinci sənaye mərkəzi olan Sumqayıta növbəti səfərini və bir sıra mühüm obyektlərin açılışında iştirakını şəhərin inkişafına göstərilən dövlət qayğısının təcəssümü kimi dəyərləndirib.
“Hamıya məlumdur ki, Sumqayıtın inkişafı məhz Ulu Öndərin adı ilə bağlıdır. Onun hakimiyyətə gəlişi ilə digər regionlar kimi, Sumqayıt da yeni inkişaf dövrünə qədəm qoydu. Şəhərin sosial-iqtisadi vəziyyəti yaxşılaşdı, yeni, müasir sənaye müəssisələri açıldı və istehsal sahələri istifadəyə verildi.
Ümummilli Lider Heydər Əliyevin siyasi irsinin layiqli davamçısı Prezident İlham Əliyevin Sumqayıta hər gəlişi, təməlqoyma mərasimlərində iştirakı, dövlət və özəl müəssisələrin açılışını etməsi, təhsil, səhiyyə, mədəniyyət ocaqların yaradılması şəhərin tarixində əhəmiyyətli hadisəyə çevrilir”, - deyə E.Hacıyev bildirib.
Oktyabrın 23-də Sumqayıta növbəti səfəri zamanı dövlətimizin başçısı Cənubi Qafqazın ən böyük Kimya Sənaye Parkında üç yeni müəssisə açdığını və təməlqoyma mərasimlərində iştirak etdiyini xatırladan Emin Hacıyev deyib ki, bu cür sənaye müəssisələrinin yaradılması qeyri-neft sektoruna töhfə verməklə yanaşı, əhalinin məşğulluq səviyyəsinin yüksəldilməsində böyük rol oynayır. Hazırda parkda 6600-dən çox insan daimi işlə təmin olunub və 2 mindən çox daimi iş yerinin yaradılması nəzərdə tutulub.
“Prezidentin açılışında iştirak etdiyi bir sıra müəssisələr ölkəmizin sosial-iqtisadi inkişafının sürətlənməsinə və yeni iş yerlərinin yaradılmasına xidmət edəcək. İndiyədək sənaye parkında qeydiyyata alınmış 38 rezidentdən artıq 20-si fəaliyyət göstərir və səfər zamanı üç yeni müəssisənin açılışı ilə həmin müəssisələrin sayı 23-ə çatıb. Bu müəssisələrdə istehsal olunan məhsulların daxili bazarda satışı ilə yanaşı, xarici ölkələrə istehsalı da nəzərdə tutulur. Bu da öz növbəsində həmin məhsullar üzrə xaricdən idxalın əhəmiyyətli şəkildə azalmasına gətirib çıxarır. Eyni zamanda, qeyd etmək lazımdır ki, bu müəssisələrin açılışı yeni iş yerlərinin yaranmasına töhfə verir. Belə ki, ilkin olaraq ümumilikdə 400-dən çox insanın daimi işlə təmin edilməsi nəzərdə tutulur”, - deyən deputat əlavə edib ki, Sumqayıtda yeni sənaye müəssisələrinin yaradılması ilə yanaşı, şəhərin ekoloji vəziyyətinin yaxşılaşdırılması istiqamətində də mühüm addımlar atılır. Fəaliyyətə başlayan hər bir müəssisənin yüksək ekoloji standartlara cavab verməsi prioritet məsələlərdəndir.
“Bu gün şəhərimiz gündən-günə inkişaf edir, müasirləşir və abadlaşır. Ölkə Prezidentinin diqqəti və qayğısı ilə həyata keçirilən layihələr, innovativ texnologiyaların tətbiqi nəticəsində artıq Sumqayıt təkcə ölkəmizdə deyil, regionumuzda öz inkişafı ilə fərqlənən sənaye mərkəzli müasir şəhərlərdən birinə çevrilib”, - deyə E.Hacıyev vurğulayıb.